Air Greenlandimeersoq mittarfeqarfimmi pisortanngortoq

Odensep mittarfeqarfiani Hans Christian Andersen Airportimi pisortanngortoq Air Greenlandip tuniniaanermut immikkoortortaqarfianit toqqaannartumik piukkunnartorsiugaralugu atorfinitsinneqarpoq. Pisortanngortoq tassaavoq Christian Berg, maannakkorpiaq Air Greenlandimi tuniniaanermut pisortatut atorfeqartoq. Berg Fynimi decembarip qaammataa 2013-imi atorfinissaaq.
Allattoq Peter Troelsen, Simon Uldum
aggustip 06-at 2013 07:14

Christian Berg 43-nik ukioqartoq angalatitsiveqarnerup iluani misilittagartuujuvoq, ukiunimi kingullerni 20-ni ilaatigut SAS-imi Swediamilu, Sverigemi mittarfeqarfinnik 16-inik piginnittunimi pisortatut sulinermigut annertuumik misilittagaqalersimagami.

- Christian Bergip timmissartuussinermik suliaqarnikkut misilittagaqarluarnera Hans Christian Andersen Airportimi iluaqutigikutsuussavarput. Christiaap suliaqarfik pillugu annertuumik ilisimasaqarnerata saniatigut aamma angusaqarluarniartuunera mittarfiup pisariaqartippai, Hans Christian Andersen Airportimmi ineriartortinneqarnerani anguniakkatta anguniarnerini atorluarsinnaagatsigit, Hans Christian Andersen Airportip siulersuisuini siulittaasoq Jørgen Clausen nassuiaavoq.

Christian Berg nuliaqarpoq arfinillillu aqqaneq marlullu akornannik ukioqartunik pingasunik paneqarluni, ilaqutariillu Fynimut ukiap ingerlanerani nuunnissartik naatsorsuutigaat.

-Fynimut nuunnissara qilanaarisupilussuuara Hans Christian Andersen Airportillu ukiuni tullinnguuttuni ineriartortinneqarnissaanut piginnaasannik tunniussisinnaanissara qilanaaralugu, Christian Berg oqarpoq. - Unamminartupilussuussaaq, aammali nunap immikkoortuani ineriartortitsinissamut suliffinnillu pilersitsinissamut periarfissarpassuaqarluni, Christian Berg oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq