Air Greenland sinissimavoq
Tamanna erserpoq radioavisip paasissutissanik nalinginnarisassaanngitsunik Namminersorlutik Oqartussanut Air Iceland Air Greenlandillu pillugu, misissuineratigut.
Air Greenland Namminersorlutik Oqartussallu apriilip qaammataani isumaqatiginninniarnermi nalaanni, nalunaarpoq aatsaat ukiamut akissuteqarsinnaallutik qanoq Namminersorlutik Oqartussanut neqerooruteqarsinnaannerminnik.
Air Iceland, Air Greenlandimut sanilliullugu isumaqatiginninniarnerup nalaani paasissutissani paasiniarsimasatsinni paasinarsivoq Air Iceland isumaqatiginninniarluarnerusimasoq.
Tamatuma kingorna, Namminersorlutik Oqartussat Air Icelandilu noovembarip 24-ani 2010-mi timmisartuussinissamut isumaqatigiissummik atsioqatigiillutik.
Namminersorlutik Oqartussat timmisartunik angalatitsiveqatigiit Air Greenland aamma Air Iceland, tamarmik neqeroorusioqquaat, tamarmillu paasiniaavigalugit bilitsit piffissaq kingulleq allanngortinneqarsinnaanissaat akikitsumillu angalatitsinissaanik aqqutissiuussisinnaanersut.
Air Greenlandimi tuniniaanermut pisortaq Klaus Johansen maajip 26-ani mailikkut ima akivoq:
- Utoqqatserpunga sapaatit akunnerinik marlunnik kingusinaarlunga akigama. Air Greenlandip piumasarinngilaa, bilitsinik akikitsunik tassa bilitsinik aappaluttunik taasakkatsinnik pisinissi iluaniissasoq piffissaq kingulleq angalanissamut allanngortitsisinnaanissaq. Annilaanngagaarput Namminersornerlutik Oqartussat bilitsinik aappaluttunik pisisalernermigut, bilitsinik qorsunnik tassa bilitsinik akisunerulaanik pisisarnerminnik unitsitsinissaat, Air Greenlandimi tuniniaanermut pisortaq Klaus Johansen maajip 26-iani mailikkut allakkamini taama allappoq.
Air Greenlandip upernaammi allakkaminni allappaat, ukiamut akinik nutaanik neqerooruteqaqqinniarlutik. Air Icelandilli isumaqatiginninniarnermut sukkaneruvoq, Air Greenlandimiillu eqaannerulluni.
Namminersorlutik Oqartussat Air Icelandimut piumasaraat, Namminersorlutik Oqartussat Air Icelandilu isumaqatigiissagunik, taava Air Iceland ukioq kaajallallugu Nuummiit Islandimut timmisartuussisassasoq.
Air Iceland Namminersorlutik Oqartussanut mailikkut ima juulip 12-ani allapput.
- Aalajangerpugut ukioq kaajallallugu Kalaallit Nunaannut timmisartuusisalerniarluta.
Namminersorlutik Oqartussat piumasatik pivaat, suli Air Greenland Namminersorlutik Oqartussanut akissuteqanngitsoq. Upernaammiit aasariaq naallugu, Namminersorlutik Oqartussat Air Icelandilu isumaqatigiissutiginiakkaminnik, mailikkut allaqatigiittarput, Air Greenland sumilluuniit Namminersorlutik Oqartussanut allagaqanngitsut. Air Greenlandillu suli tassa isummatik paarigaat, tassa akikinnerusunik bilitsinik Namminersorlutik Oqartussanut tuniusiumanatik, akerlianik Air Icelandip Namminersorlutik Oqartussat piumasaat akueraat.
