Air Greenland nutaanik qulimiguulittaarusuppoq

Oqaluuserisassaq ataasiinnaavoq:

Tassalu ulluinnarni aqutsisut timmisartuussileqatigiiffiup Bell 212-iinik taarsersuinermik aallartisaanissaannut piginnaatitsissummik tunineqarnissaat.

Tamanna qulimiguulinnik EC155-inik pingasunik, aamma Eurocopterinik taaneqartartunik 13-inillu ilaasoqarsinnaassunik marlunnillu inuttaqartunik pisinikkut pissaaq.

Eurocopterit pingasut, immikkut ataatsimeersuarnermut aggeqqusissut naapertorlugu, maannakkorpuaq 105,1 mio. koruunilerlugit tuniniarneqarput.
 

- Qulimiguullit Bell 212-it taarsernissaat qangali kissaatigaarput, taarsersorneqarnissaallu aappaagumit aallartissatut pilersaarutaagaluarpoq, Air Greenlandimi siulersuisut siulittaasuat Jens W. Willumsen ullaaq manna oqarpoq.

Eurocopterinik pingasunik akuersaarneqarsinnaasumik akilinnik pisinissamut maanna periarfissaqaleriasaarpugut, taamaammat piginnittutsinnit pisinissamut akuerineqarnissarput kissaatigaarput, siulersuisut siulittaasuat oqarpoq, taanna aamma oqaluttuarpoq qulimiguullit pisiariarneqartut Kujataani angallassinermi atugassatut naatsorsuutigineqartut.

Bell 212-inut pisoqaasunut naleqqiullugu ilaasoqarnerusinnaapput ingerlatsinikkullu akikinnerullutik, Jens W. Willumsen oqarpoq, immikkullu ataatsimeersuarnermi sisamanngornermi juulip 18-iani pisussami akuersisoqarneratigut pisisoqarsinnaassasoq neriuutigalugu.