Air Greenland sinneqartoorujussuartoq
Taakku 2013-imi naatsorsuutinut sanilliullugit 17,5 millionit koruuninik pitsanngoriaateqarput.
- Ingerlanerliortoqaraluartoq Air Greenland angusaqarluarmat nuannaarutigaarput. Ilulissani siorna januaarimi ajutoortoqareersorlu isumannaallisaanikkut sukaterisoqarmat, Naalakkersuisut aamma nuannaarutigigaat Naalakkersuisut Siulittaasuata Kim Kielsenip oqaatigaa.
Aamma atuaruk Air Greenland 2013-imi naatsorsuutimigut sinneqartooruteqarpoq
Tamanna Namminersorlutik Oqartussanit nuannaarutigineqarpoq, taakkumi 11,25 millionit koruuninik agguagarsisussanngoramik.
Ilaasut ikileriaateqalaaraluartut attartortitsinermi siuariartoqarneratigut pitsaasumik taama angusaqartoqarpoq.
Tamatuma kinguneranik pisariillisaasoqarneratigullu aningaasartuutit ikilisinnerisigut akuerineqarsinnaasumik angusaqartoqarpoq.
Taama angusaqarluartoqarnerata kinguneranik Namminersorlutik Oqartussat siulersuisuni ilaasortaatitaat marluk, tassaasut Jens Willumsen aamma Julia Pars siulersuisuni ilaasortaaginnassapput.
Danmarkimi naalagaaffiup siulersuisuni ilaasortaatitani ataaseq allamik taarserpaa, tassa Lars Tybjerg, Claus Holsteinimit taarserneqarami, taannalu Bjarne Ekelund aamma SAS-ip siulersuisuni ilaasortanngorteqqitaa Benny Zakrisson aamma Leif Rasmussen peqatigalugit Air Greenlandip siulersuisuini ilaasortaalerput.