Air Greenland 2013-imi naatsorsuutimigut sinneqartooruteqarpoq
Sinneqartoorutit Air Greenlandip ukiuni kingullerni sinneqartoorutigisartagaannit ikinnerusut, siulersuisuni siulittaasup Jens Wittrup-Willumsenip nassuerutigaa, oqaatigalugulu 2013-imi niuerfik naatsorsuutigineqartutut ineriartunngitsoortoq. Taamaattorli naatsorsuutit inerneri naammaginartutut siulersuisut isumaqarfigaat.
- Ilaasutigut imaluunniit attartortitsisarnikkut niueruteqarneq naatsorsuutigineqartutut annertuserianngillat. Ukiup ataatsip matuma siornatigut niuerfiup siuariarnissaa naatsorsuutigineqarsimagaluarpoq, kisiannili inuiaqatigiit kalaallit ataatsimut isigalugit aningaasakilliornerisa, taamaalillunilu uuliamik aatsitassanillu ujarlernerup annikillinerata kingunerisaanik tamanna pinngitsoorluni, Jens Wittrup-Willumsen oqarpoq.
Naatsorsuutini angusat qulimiguulinnik EC225-nik marlunnik pisiniaraluarnerup taamaatiinnarneqarneranit sunniuteqarnerluffigineqarput.
Tamatuma peqatigisaanik bilitsinik atuinermi periaatsimik nutaamik Amadeus Alteamik atuilerneq aningaasartuuteqarfigineqarpoq. Taamaattorli tamatumunnga peqatigitillugu atuisut Air Greenlandimit nunani tamalaani timmisartuutileqatigiiffinnut allanut bilitsinik ataqatigiissitsillutik angalanernik pisisinnaalerput.
Tamakkuninnga unammilligassaqaraluartoq, timmisartuutileqatigiiffik naammaginartumik angusaqarpoq, tassami suliffeqarfiup aqutsisuisa sulisullu aningaasartuutinik ikilisaanissaq eqqummaariffigisimagaat timmisartuutileqatigiinnit tikkuarneqarpoq.
