Air Greenland Islandimut timmisartuussisalissaaq

Timmisartortitseqatigiiffik Air Greenland aappagumiit Reykjavikkip Nuullu akornanni toqqaannartumik timmisartuussisalissaaq. Timmisartortitseqatigiiffiup Air Greenlandip timmisartut pisiai nutaat Dash 8-200-it atorlugit Reykjavikkip Nuullu akornanni timmisartuussisarnerit juunip ulluisa 26-anni aallartinneqassapput, septembarillu ulluisa sisamaata tungaanut timmisartuussinerit ingerlanneqasssallutik.
Allattoq Jaaku Lyberth
novembarip 23-at 2009 15:39

Timmisartukkut angallannerpaaffiup nalaani tassalu maajip ulluisa tallimaannit septemberip ulluisa 29-ata tungaanut Air Greenland Nuup, Reykjavikkip Narsarsuup akornanni utimullu Nuummut sapaatip akunneranut ataasiarluni timmisartuussisarniarpoq.

Timmisartuussiffiusussani ilaasunut akit qanoq akeqartinneqassanersut tusagassiuutinut nalunaarummi takuneqarsinnaanngilaq, taamaattorli akit unammillerneqarsinnaasunik annertussusilerneqassasut oqaatigineqarpoq. Timmisartorluni Islandimut akit angalanissanullu pilersaarutit tallimanngornermi novembarip ulluisa 27-anni Air Greenlandip nittartagaani aamma angalatitsivinni takuneqarsinnaalissapput.

Air Greenland timmisartuussisarnerminik nutaanik aallartitsinissamut atatillugu timmisartuussisarneri allat allannguuteqarput. Timmisartorsuaq Kangerlussuarmit Danmarkiliartartoq akunnernik marlunnik kingusinnerulluni aallartalissaaq.

Kingusinnerusukkut aallartalerneratigut Danmarkimi illoqarfinni timmisartuussiffiusartut angumerineqarsinnaanissaat siunertarineqarpoq.

Island-ip Kalaallit Nunaatalu akornanni Air Icelandip timmisartuussisarnera maannut ingerlasoq iluatsilluarsimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq