Air Greenland: Ilungersunartunik sunniuteqartussaanera ilisimavarput
Tamatuma inuiaqatigiinnut ilungersunartumik sunniuteqarnissaa ilisimavarput, Sulisoqarnermut pisortaq oqarpoq. Tamatumunngali peqatigitillugu timmisartuutileqatigiit isumaqatigiinniarnerit ingerlateqqinnissaannut aggersaasimanngillat.
- Pisut tamaanga killinnerat ajuusaarutigeqaarput, tamatumalu sullitatsinnut inuiaqatigiinnullu kingunerlussinnaanera nalunngilarput. Kisianni aaqqiissutissanik nassaarsinnaarsimanngilagut, Mads B. Christensen oqarpoq.
Taamaattorli Air Greenlandip iliuuseqartussatut inissisimaneranik Serviceforbundimeersumit Toni Rytkønenimit, timmisartortartunik isumaqatigiinniussisumit oqaaseqartoqarnera ilumuunnginnerarpaa.
Sulisoqarnermut pisortap ilanngullugu ilisimatitsissutigaa, Air Greenlandip timmisartortartullu sinniisaasa akornanni naapeqqinnissamut isumaqatigiinniaqqinnissamulluunniit isumaqatigiissuteqartoqanngitsoq. Taamaattumik isumaqatigiinniarnerit unittooqqanerat piffissami sivisunerusumi pisinnaavoq.
Taavami Air Greenlandimit qanoq alloriaqqittoqassava?
- Neqeroorutitta ajoriinnagassaannginnerat Serviceforbundimut erseqqissassavarput. Assersuutigalugu piumasaraarput timmisartortartut ukiumut ullut suliffigisartagaat 192-iusut 198-inut amerlineqassasut, akissarsiatillu qaffasereeqisut pigiinnarsinnaagaat. Nunatsinni sulisartoq nalinginnaasoq ukiumut ullunik 28-nik amerlanerusuni ukiumut sulisarpoq.
