Air Greenland eqqugaasunut aqagumuinnaq akiliussiniarpoq

Aamma Islandimi Keflavikimi mittarfik eqqugaavoq, taamaalilluni Air Greenlandip Islandimut aasaanerani timmisartuussisarnissaa aallartittussaagaluartoq aamma kinguartinneqarluni.

Nuummiit avannamut Danmarkimiillu Nunatsinnut timmisartuussinerit eqqugaanngillat. Air Greenlandip Nuummiit Paamiunut ullaarmanna timmisartuussinissami aamma naatsorsuutigaa.

Kujataanut Tunumullu timmisartuussinerit aqagu marlunngornermi ingerlanneqarsinnaanissaannut tunngasumik ullumikkut kingusinnerusukkut paasissutissiisoqassaaq. Qaqqap innermik anitsisup qullaatsitaasa ullumikkut sumut nikikkiartornerat apeqqutaassammat.

Taamaattorli Air Greenlandimit maluginiaqquneqarpoq, sinersortaat aqagu ullaakkut qulingiluanut Nuummiit kujammukarluni aallartussaammat. Kujataaliarsinnaanissaq qulakkeerniaraanni, Arctic Umiaq Line attavigineqarsinnaavoq, Sarfaq Ittuup marlunngornermi ullaakkut kujammut aallarnissaanut bilitsisisoqarsinnaassammat.

Timmisartumut ilaasussaagaluit, pingasunngorneq maajip aqqaneq-aappaat ilanngullugu bilitsisisimasut, bilitsiminnik allanngortitsisinnaanissaannik utertitsisinnaanissaannilluunniit Air Greenlandimit periarfissinneqarput.

Tamatumunnga peqatigitillugu ilaasut ingerlariaqqinneq ajulersut, aqagu ullaap tungaanut unnuinerat nerisaqarnerallu Air Greenlandimit akilerneqassaaq. Tamatuma kingornagut qaqqap innermik anitsisup qullaatsitai pissutigalugit ilaasut Nunatsinni ingerlariaqqinneq ajulersut akiliunneqartarunnaassasut, timmisartuutileqatigiiffiup nalunaarutigaa.