- Nunaqarfinni tunitsiviit ingerlaannarnissaat pingaaruteqartupilussuuvoq, taamaattumik Royal Greenlandimut Arctic Green Foodimullu kiffartuussinissamut isumaqatigiissusiornerit naammagisimaarnarput, Naaja Nathanielsen oqarpoq.
Royal Greenlandimut Arctic Green Foodimullu 2010-mut katillugit 20 millionit koruunit aningaasaliissutigineqarput.
Naak Arctic Green Foodimut kiffartuussinissamut isumaqatigiissut 2010-moortoq isumannaarneqareeraluartoq Arctic Green Foodimut kiffartuussinissamut isumaqatigiissutip siunissami atorunnaariartulernissaa suli pilersaarutaasoq, Naaja Nathanielsen oqarpoq.
- Aaqqissuusseqqinnissamik Naalakkersuisut suliaqarput aamma aaqqissuusseqqinnissamut atatillugu naatsorsuutigaarput 2010-p ingerlanerani siumut ingerlalertoqarumaartoq, aamma Kalaallit Nunaanni inuussutissarsiuteqarnikkut sinaakkusiisoqarumaartoq, taamaattumik neriuppugut, Arctic Green Foodimut Royal Greenlandimullu kiffartuussinissamut isumaqatigiissutit isumalluutigivallaarnagit aningaasarsiornikkut imminut nammassinnaalernissaq angujartorneqalissasoq, Inatsisartut aningaasaqarnermut ataatsimiititaliaanni siulittaasoq, Naaja Nathanielsen oqarpoq nangillunilu:
- Aningaasaqarnermut ataatsimiititaliami periarfissaasinnaasunik allanik eqqartuingaatsiarpugut, aalisarnikkut inuussutissarsiorneq killeqalertillugu inuussutissarsiornikkut allatigut periarfissiisoqarsinnaanera pingaartipparput, taamaattumik nunaqarfinnut aningaasaliissutigineqartut ilinniartitsinernut allanullu ilinniartitseqqiinernut atorneqarnissaat pingaartipparput.