AGF: Kommuni aamma akisussaaqataavoq
AGF-ip Illoqqortoormiuni tunisassiorfiata 2008-mili matoqqasimanera, borgmesterip sapaatip-akunnerata massuma ingerlanerani isornartorsiorpaa.Tunisassiorfiup matoqqanerata tunisassiortup nammineq akisussaaffigigaa, borgmesterip taamanikkut oqaatigaa.
- Suliffeqarfiup, najukkani piniartut tunitsiveqarnissaannik qulakkeerinninnissamut pisortanit ukiut tamaasa tapiissutisisartup, siunertaminik naammassinnissinnaannginnera akuerineqarsinnaanngilaq, Asii Chemnitz Narup isornartorsiuinermini ilaatigut oqarpoq.
Piviusorli allaasoq, Arctic Green Foodip maanna oqaatigaa.
Illoqqortoormiuni tunisassiorfiup ukiut sisamat missaanni matoqqaneranut kommuni akisussaaqataaffigigaa, AGF-ip oqaatigaa:
- Tunisassiorfik 2011/2012-imi pillugu AGF-ip kommunillu akornanni pilersaarusiorfigineqaraluartoq ilumoorpoq, pissutsilli assigiinngitsut pissutigalugit pilersaarutit kinguartinneqarlutik. AGF-ip aalajangermagu maanna iliuuseqarfigineqartariaqartoq, kommunimit itigartitsisoqarpoq. Ukioq aningaasaliiffigisassaq nutaaq atuulilereersimanerarneqarpoq, aningaasallu taamaammat peqaratik. AGF saaffiginnikkaluarpoq, itigartitsisoqarlunili, Arctic Green Foodip tunisassiornermut pisortaata Arne Spicer Lindgrenip oqaatigaa.
Tunisassiorsinnaanerulli killeqarnera kisimiilluni pisuussutigiumanngilaa:
- AGF-ip akisussaaffini qimarratiginianngilaa, pineqartorli ilungersunarsinnaavoq, tunisassiornermut pisortaq oqarpoq.
Arctic Green Foodip oqarnera naapertorlugu Kommuneqarfik Sermersuup oqaatigaa tunisassiorfiup atortui atorsinnaajunnaarsimasut, teknikkikkulli nalunaarusiaq siornatigut saqqummersinneqarsimasoq naapertorlugu, teknikererlu sapaatip-akunnerata ataatsip matuma siornatigut takusaasup oqaatigaa atortut aserorsimanngitsut:
- 100.000-it koruunit missaannik nalilimmik tunisassiorfik nutarterneqarpat tunisassiorfik ammaqqissinnaavoq, taamaammat atortut atorsinnaajunnaarsimanerannik oqartoqarnera paasiuminaatsippara, Arne Spicer Lindgren oqarpoq, ikioqatigiinnikkut suleqatigiinnikkullu pissutsit aaqqiivigineqarsinnaanerarlugit:
- Illoqqortoormiuni tunisassiorfik AGF-ip aaqqiivigerusuppaa, tamaani tunisassiarineqarsinnaasut amerlaqimmata. Sooq taava aaqqiagiinngissuteqartuassaagut, pissutsit suleqatigiinnikkut aaqqiivigineqarsinnaappata, AGF-ip tunisassiornermik pisortaata Arne Spicer Lindgrenip apeqqutigaa.
Arctic Green Food piffissami kingullermi isornartorsiorneqartorujussuuvoq, 11 millionit koruuninik Namminersorlutik Oqartussanit tapiiffigineqartaraluarluni, tunitsivimmi ammatinnissai ajornartorsiutigisorujussuummagit.
Borgmester Asii Chemnitz Narup tallimanngormat oqaaseqartinniaraluaratsigu iluatsinngilarput.
