Agathe Fontain: Imigassartorpallaarnerup kinguneranik qaratsmikkut innarlersimasut utoqqaat illuaniittassanngillat

Agathe Fontain-ip saqqummiussaqarnerminut tunngavilersuutaasa pingaarnersarai, imigassartorpallaarnerup kinguneranik qaratsamikkut innarlerneqarsimasut utoqqaat illuinut inissinneqarneranni taakku utoqqarnut peqqissunut toqqissisimanngitsitsisarneri aamma immikkut ikorneqartariaqarneri oqaatigalugu tunngavilersuutigai.

- Imigassartorpallaarnerup kinguneranik qaratsimikkut innarlersimasut sakkortuumik pissusilersortarput nipituumillu nilliasinnaallutik, tassalu taamaaliortarneri utoqqaat illuini najugaqartunut allanut eqqisisimajunnaartitsisarlutik. Tassa tamassuma allanngortinnissaa angorusullugu siunnersuuteqarpunga.

Inatsisartunut ilaasortaq, Agathe Fontainip siunnersuuteqarnerminut tunngavilersuutini taama oqaatigaa.

Imiagassartorpallaarnerup kingunerani qaratsamikkut innarlerneqarsimasut, utoqqaat illuaniitinneqartut immikkut ikiortariaqarluinnartuusartut, Nuummi Utoqqaat Illuanni pisortap, Rosa Marie Elsnerip oqaatigaa aamma oqaatigalugu Utoqqaat Illuini najugalinnut allanut toqqissisimanngitsitsisaqisut. Rosa Marie Elsner ima nangippoq.

- Qaratsamikkut innarlerneqarsimasut ajunnginnerpaamik inuuneqartinniarlugit sulisut arlallit atorneqartarput. Sakkortuumillu taakku pissusilersoraagata utoqqarnut allanut sunniutipilunnginnissaa anguniarlugu eqqissiviilliortitsisoq malittariuartarparput.

Rosa Marie Elsnerip ilanngullugu oqaatigaa imigassartorpallaarnerup kinguneranik innerlerneqarsimasut pitsaanermik ikorneqassappata taava taakku ilaat pisinnaanerusut immikkut angerlarsimaffimmiitinneqartariaqaraluartut.

Rosa Marie Elsnerip taama oqarnera Inatsisartunut ilaasortap, Agathe Fontainip isumaqatigaa ima oqarluni .

- Imigassamik atuipilunnerup kingorna qaratsamikkut innarlersimasut iluamik sullinneqassappata, sulisut tamatumunnga ilisimannilluartut atorneqartariaqarput. Isumaqarpungalu qaratsamikkut ajoqusersimasut immikkut inissinneqartariaqartut kisianni ataatsimorsuaq taamaa inissinnagit ikittunnguakkaarlugilli, Agathe Fontain oqarpoq.

Imigassamilli atuivallaarnerup kinguneranik qaratsamikkut innarlersimasut Nunatsinni qassiuneri paaseqqaartinnagit aamma sunik pisariaqartitsineri paaseqqaartinnagit, Naaklakkersuisut qanoq ittumik iliuuseqarnissaminnik pilersaaruteqanngikkallartut, Peqqissutsimut Naalakkersuisup, Steen Lynge-p radioaviisimut oqaatigaa.

Agathe Fontainip Inatsisartut aalajangiiffigisassaattut siunnersuutaanut, Peqqissutsimut Naalakkersuisup akissummini aamma oqaatigaa, imigassamik atuivallaarnerup kinguneranik qaratsamikkut innarlersimasut ikiorserneqassappata, utoqqaat utoqqalinerminni pitsaasumik inuuneqarnissaat qulakkeerniarlugu ataatsimoortumik Naalakkersuisut pilersaarusiorpata, qaratsamikkut innarlerneqarsimasut pilersaarummut tassunga ilanngunneqarumaartut neriorsuutigalugu oqaluttarfikkut oqaatigaa.