AG allanngussanngilaq

 - Imatut allanngortiterujussuarnianngilanga. Soorunami Atuagagdliutiup aaqqissuisua allatut isikkoqartussaavoq. Inuk allaaneruvoq. Kisianni allaaserisagut, sammisartakkagut AG-mi allannguuteqarujussuarnavianngillat, Heidi Møller oqarpoq.

Naak nunatsinni aviisit siunissaat aningaasaqarniarneq pissutigalugu nalunaraluartoq Heidi Møllerip aviisip piujuaannarnissaa neriuutigaa, nunatsinnilu aviisit pisoqaanersaanni aaqqissuisunngornissani  isummerfigaa.

- Imaanngilaq ullut tamaasa eqqarsaatigisariga, naak aviisi pisoqaanersaagaluartoq. Kisianni soorunami ataqqivara aamma paariniarsarissavara, Heidi Møller naggasiivoq.

Heidi Møllerip aaqqissuisuunissaa ukiumik ataatsimik sivisussuseqassaaq, tamannalu nalinginnaanngitsutut taaneqarsinnaavoq. Sermitsiaq/AG-mi Pisortaaneq Poul Krarup ima nassuiaateqarpoq.

- Heidi Møllerip aaqqissuisuuginnarnissaa soorunami kissaatigigaluarpara. aningaasaqarnikkulli inissisimanerput nalorninartillugu allaanerusumik ilioriarsinnaangilanga. Politikerit marlunnik aviisiiteqaannarnissatsinnik aalajangernissaat utaqqiinnaratsigu, Poul Krarup oqarpoq.

Tusagassiuuteqarnermut politikki utaqqimaarnerarlugu aamma oqaatigaa.

- Naluara matussanerluta imaluunniit sorliit matussanersut. Siulersuisut tamanna aalajangertussaavaat, Poul Krarup oqarpoq.

Heidi Møller atorfittaassami saniatigut Atuagassiami Arnanuni aaqqissuisuuvoq.