AG: Aatsaallu
AG-mi akisussaasuulluni aaqqissuisoq tusagassiorfinnut nalunaarummi ima allappoq:
-Arnat inuusuttut marluk Aasianneersut toqutsisimasutut pineqataatissinneqarnerannut atatillugu Ivinnguaq Brandtip, pineqaatissinneqarsimasup atiiata, assinginik kukkunikkut ilanngussisimanerput AG-mit ajuusaarutigalugu ullumi nalunaarutigaarput. Kukkusoqarsimanera paasigatsigu, aviisi qarasaasiatigoortoq nittartakkatsinni pisiarineqarsinnaasoq, erngertumik allanngortipparput.
Aviisip naqitap pisarnertut sinerissami niuertarfippassuarnut suli siammarterneqarsimannginnera aamma paasivarput. Taamaammat aalajangerpugut naqitikkagut tamakkerlugit unitsinniarlugit aviisilu iluarsisaq naqiteqqinniarlugu, taannalu piaarnerpaamik niuertarfinnut nassiussuunneqarumaarpoq.
AG-p e-aviisip kukkunertallip piffissami sivisunngitsumi nittartakkamiissimanera ajuusaarutigeqqissavaa. Taamatuttaaq Ivinnguaq Brandt aamma utoqqatserfigaarput, taannami ajoraluartumik aviisip kukkuluttorneratigut eqqugaammat, Christian Schultz-Lorentzen naggasiilluni allappoq.