Afrika Kalaallit Nunaanniit ikiorneqarpoq

 Danmarkimi Røde Kors ippassaq katersuiniartitsimmat 1 millionit koruunit katersorneqarput, nunarsuarmilu ajorsaatilinnut ikiorsiiniartoqartillugu Kalaallit Nunaat malinnaalluartaqisoq oqarsinnaavugut.

Qallunaalli katersaat inuup ataatsip tunisinermigut tupaallannaannartumik marloriaatinngortippai. Containeri atisanik ikiuutissanik ikisivigineqartartoq, illoqarfiup Jyderupip qanittuaniittoq, ippassaq imaarneqarmat aningaasarpassuarnik siumuisoqarpoq. Atisarpassuimmi akornanni 1 millionit koruunit allakkanik nassuiaaserlugit allakkat puussaannut ikineqarsimapput, allakkallu oqaasertalerneqarsimapput aningaasat Røde Korsimukartuusut.

Røde Korsimi sulisut aningaasarpassuit qujaruteqaat, naak inissinneqarfiat eqqumiigineqarsinnaagaluartoq.

- Assingusumik misigisaqarsimanngisaannarpugut, tunissutilli qujaruteqaavut. 1 millionit koruuninik tunineqarnitsigut tatigineqarluta paasivarput, tamannalu uatsinnut tulluusimaarnaqaaq, Røde Korsimi qullersaq, Anders Ladekarl nutaarsiassaqartitsivimmut Ritzauimut oqarpoq.

Afrikap kangisissuani nunani Kenyami Somaliamilu panernersuaqarnera maanna ima ingasatsigaaq, Somaliami nunap avinnerini marlunni kaannersuaqartoq Naalagaaffiit Peqatigiinnit nalunaarutigineqarluni. Inuit 10 millioninit amerlanerit eqqugaapput, ikiorneqarnissaminnillu pisariaqartitsillutik. Taakkunannga 3 millionit Somaliami najugaqarput, meeqqaallu pingasuugaangata ataaseq nerisassaqarneq ajorpoq.

Aningaasanik ikiorseerusukkuit ikisiffigineqarsinnaasut tunniussiffigiartorneqarsinnaasullu uku Kalaallit Røde korsianiit nalunaarutigineqarput:

Allakkerisarfikkut: Giro 423 42 00

Bankikkut: 9541 – 4234200. Atornikuerniarfimmut Kalaallit Røde korsianulluunniit nuummiittumut tunniussiartortoqarsinnaavoq.