Afghanistanimi nunap sajorujussuarneranit inuit ikinnerpaamik 20-t ajunaartut

Afghanistanip avannaani nunap sajunnera pissutaalluni ajunaartut amerliartorput. Inuit 320-t aqqunarput.

Allattoq Ritzau

novembarip 03-at 2025 07:30

Nutserisoq Medea Olsen, Tabetha Kreutzmann

Afghanistanip avannaani nunap sajunnerani inuit 20-t ajunaarput inuillu 320-t aqqunarlutik.

Sharafat Zaman, Afghanistanimi peqqinnissamut ministereqarfimmi Talibaninit aqunneqartumi oqaaseqartartoq, videokkut taama oqaaseqarpoq. Videoliaq tusagassiuutinut nassiunneqarpoq, taakkulu akornanni aamma nutaarsiassaqartitsivimmut Reutersimut.

Zaman tamatumunnga atatillugu allappoq, kisitsisit taakku avannaani nunap immikkoortuini Balkhimi Samanganilu atuuttut, kisitsisillu taakku suli tamakkiisumik naatsorsorneqarsimanngitsut.

Nutaarsiassaqartitsivik AFP naapertorlugu, nunap sajunnera, Den Amerikanske Geologiske Undersøgelse (USGS)-imit uuttortarneqareerluni 6,3-mik nalilerneqarpoq ataasinngornerullu unnuaani pisimalluni.

USGS naapertorlugu nunap sajunnera 28 kilometerisut ititigisumi pivoq, illoqarfimmilu Kholmimi, Balkhimi illoqarfiup annerup Mazar-i Sharifip eqqaaniittumi.

Toqusut aqqunartullu amerlapput, nunali tamakkerlugu kisitsisit suli saqqummiunneqanngillat.

Nunap sajunneri annertuut arlallit

AFP-p tusagassiortuisa Afghanistanimi illoqarfiit pingaarnersaanni Kabulimiittut sapaatip unnuaani nunap sajunnera malugisinnaavaat. Kabul nunap sajunneranit 250 kilometerit missiliorlugit kujataata kangiatungaaniippoq.

Videoliani inoqatinut attaveqaatini siammarterneqartuni takuneqarsinnaasutut inuit inunnik qarmarsuup ataani nikinneq ajuleqqasunik ikiorsiiniarsaripput, soorluttaaq illut aserorsimasut takuneqarsinnaasut, Reuters allappoq.

Nutaarsiassaqartitsiviup videoliat ilumoornersut uppernarsarsinnaasimanngilaa. Aamma videoliat assillu suminngaanneernersut allassimanngilaq.

Reutersip tusagassiortua naapertorlugu Mazar-i Sharifimi innuttaasut arlallit nunap sajunnerani illutik uppinnissaat annilaangagalugu aqqusinermut arpakaasimapput.

Talibanit Afghanistanimi 2021-mi pissaaneqalernerisa kingorna, nunap sajoqattaarnerisa kingorna isumaginnittuusariaqarsimapput.

/ritzau/

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.