Adventi - Qulliit juullerpaluttut ikiterfiat
Adventeli ilagiinnut ukiortaarsiornerinnaanngilaq. Sapaassuaq siulleq latinerisut Adventus Dominimik - Naalakkap aggerneranik - aallaqqaammut taaguuteqarpoq.
Naalakkap meerannguatut inunngorluni tikiussimanera aamma nunarsuarmut uteqqinnissaa adventi aallarnerfigalugu oqaluffimmi nalliuttorsiutigineqalertarpoq. Tamanna biskop Sofie Petersenip ima oqaasertalerpaa:
- Adventi isumaqarpoq 'aggerpoq, tikiuppoq, tikiutilerpoq', aamma oqaluffimmi najoqqutassat aappaat tassaavoq qatigatsuup qaavanut ingilluni Jerusalaamut iseriartornera. Annaassisoq tikiutilerpoq, taamaalilluta uagut piareersassuugut. Qamuuna piareersassuugut Annaassisorput inunngulermat, Sofie Petersen oqarpoq.
-Herrnhuttit, tassa qatanngutigiinniat, ileqqui ulloq manna tikillugu nunatsinni atuupput, ileqquisalu ilaraat adventip sapaataasa siullianni igalaami ullorialiisarneq. Tamanna ileqqoq nunatsinni peertussaanani ileqquliunneqarsimavoq.
- Amerlanerusugut ulloriaq aappaluartoq atortarparput, Nuummi taamaattunik ullorianik arlalinnik nivingasoqartartoq takusarpara.
Qatanngutigiinniat 1733-mi nunatsinnut pipput , ukiullu 200-t missaanni maaniillutik.
- Herrnhuttininngaanneerput Tysklandimi kristumiut pietistit (pietisme latinerisoorpoq isumaqarlunilu
upperluarneq) upperluarniaqqissaartut. Lutherikkunninngaanniit immaqa sakkortunerusutut oqaatigineqarsinnaapput, tassa kalaallinut assut qanittunik. Misigissutsinut qaninnerugaagaartumik qatanngutigiinniat ileqqoqarsimapput, Sofie Petersen oqarpoq.
