ADHD autismelu pillugit pikkorissaanerit
Inuit 30-t sinerissamit maajip ulluisa 28-iannit juunip aallaqqaataata tungaanut ADHD aamma autisme pillugit pikkorissaqataaffigisaat Perorsaanermik Ilinniarfimmi naggaserneqassaaq.
Pikkorissarnermi peqataasut inunnik ADHD-ertunik imaluunniit autismertunik sullitaqartuupput. Piorsaavimmi pikkorissartitsinerit anguniagarivaat pikkorissartut pikkorissareernerup kingorna tullissaanut pikkorissarniarnissaminut nammineq ilikkakkaminnik ingerlatitseqqissinnaassasut. Imatut paasillugu atuagarsornermi ilikkakkatik suliffimminni atorlugit tullissaanut pikkorissarneq nanginneqarpat ilikkakkaminnik ilaminnut saqqummiussinertalimmik ilikkagarisimasatik saqqummiuttassallugit, Karo Thomsen Fleischer, Piorsaavimmi pisortaq oqarpoq nangillunilu:
ADHD aamma autisme pillugit pikkorissarnermi makku ilaatigut sammineqarput: Nalunaarsorneri aammalu inuiaqatigiinni tunngavigineqartut, tarnikkut pisunik nassuiaatit, Inuunermi atukkatigut oqaluttuassartat, titartakkat malillugit oqaloqatigiissinnaaneq, qarasarsorluni ilikkakkat aallaavigalugit perorsaasiaatsinut tunngasunik iliuuserinissamut atortorineqarsinnaasut ass. KAT-kasse.
Inulerisut suliaqarnermikkut aamma suleqatigiiullutik kiisalu avataaniit suleqatigisatik ilaatigut oqaloqatigiinnikkut paatsooqqatigiissinnaaneq pisarmat, pikkorissarnermi aamma ilaatinneqartarpoq ”Suleqatigiilluni ajornartorsiutinik aaqqiissuteqarniarneq”.
Ulluni makkunani naggataarnermikkut pingaarnertut sammisussaavaat: Ineriartorneq, suleqatigiinneq aamma akaareqatigiinnginnermi pisoqartillugu qanoq iliuseqarsinnaaneq.
Minnerunngitsumillu aamma sammivaat: Angajoqqaanik suleqateqartarneq aamma Angajoqqaanik ilinniartitsineq kiisalu Kajumissuseqarneq
- ADHDertut qanoq sullinneqartarnersut nalunikuura, tunuarterfigisarsimavakka eqqarsartaatsimikkut napparsimasutut isiginikuugakkit qanillineqarsinnaanngitsut. Massakkut sullissinissannut kajumissuseqarneruluerpunga paasinerulernikuugakkit ADHDertut innarluuteqartuummata, pikkorissaqataasoq Lars Peter Frederiksen, Qaqortumi Angerlarsimaffik Akilliit sulisoq oqarpoq.
Pikkorissaqataasoq alla Sara Street ilassuteqarpoq imatut: ADHDimik autismemillu innarluutillit qanoq suleriuseqarnissara paasivara. Aaliangersimasumik kiisalu sinaakkusersorsimasumik sullinneqarnissaata pingaaruteqarnera aamma paasivara. Sara Street Uummannami Meeqqerivimmi Nuunu sulivoq.
- Innuttaasunik illoqarfitsinni paasisitsiaanissaq pisariaqartoq paasivarputttaannalu anguniarlutigu uterutta. Iluatinnaateqaramik taakku ilikkakkavut nunaqqatitsinnut paasissutissiissutiginissaat, Ane Johansen, Atuarfimmi specialklassemi kaammattortaasoq oqarpoq.
Pikkorissaanerit immikkoortuisa kingullersaat maajip 28-ianit juunip aallaqqaataata tunganut ingerlanneqarput.
