Aavariaq politiinit ujaarineqartoq
Angut kammalaatinilu Nuup Kangerluanut aavariarsimapput isumaqatigiissimallutillu arfininngornermi umiatsiap eqqaani naapinniarlutik, angut kammalaatini 40-nik ukiulik isumaqatigiissut malillugu takkutinngimmat ernumalerpoq Nuummilu Politiinut kammalaatini tammartoq kalerriutigalugu.
-Angut pineqartoq peqqissuuvoq pinngortitamilu angalanermut sungiussisimasoq, isumaqatigiissullu malillugu takkussimanngimmat ajunaarsimasinnaasoq aarleqqutigineqalerpoq. Akunnerit 24-it tammaaneqareermat sapaatiummat ujaarineqalerpoq, politiit qulimiguulimmik attartorput, politiit ujaasitinneqalerput allaat politiit qimmii ikiorsiorlugit ujarlertoqarluni, taama Nuummi Politiit ilisimatitsipput.
Aavariaq nassaaraat
Sila taarsimmat taarpallaarnera pissutigalugu aavariamik ujaarlerneq unitsikkallarneqarpoq. Sapaatiummat unnukkut qulinnguat eqqaani aavariaq ujarneqartoq nammineerluni umiatsiamut uterpoq. Aavariaq uloriarnartorsiunngitsoq ujarneqarnera politiinut aningaasatigut akisuvoq. Angutip tammaaneqartup VHF radioqarsimasuuppat imaluunniit satellitsikkut oqarasuaateqarsimasuuppat ujaarlerneq pinngitsoortinneqarsimassagaluarpoq.
-Politiiniit sakkortuumik inassutigerusupparput aavariat kisimiillutik aavariartassanngitsut, arlaatigut pisoqarsinnaasarmat, soorlu orlulluni nioq napineqarsinnaavoq assigisaanillu pisoqarluni. VHF radio nassartaruk, imalunniit satellitsikkut oqarasuaat, GPS, pujorsiut, nunap assingalu. Taamaaliornikkut aningaasarpassuit sipaartitsisinnaavutit, taama Nuummi Politiit ilisimatitsipput.