Aavaat Lund Domkirkemi tusarnaartitsissapput
Lund domkirke Danmarkip ataaniinnikuuvoq taamaattumillu Aavaat danskit domkirkeni tusarnaartitsisaqattaarlutik angalanerannut ilaanissaa pissusissamisuuginnarpoq. Aavaat Sverigemi tamanut ammasumik tusarnaartitsinerisa siullersarissavaat. Erinarsoqatigiit siornatigut Sverigemi kunngikkormiunut tusarnaartitsereernikuupput.
- Danmarkimi domkirket tamakkerlugit tusarnaartitsiffiginissaat nammineerlunga takorluugarinikuuara. Ukiut arlallit matuma siorna, Aavaat Roskilde Domkirkemi 2000-imi juullimi tusarnaartitsinerisa kingorna eqqarsaat pinngorpoq, aamma ukiut marlussuit matuma siorna naalagiartitsinermut peqataavugut tullianilu Københavnip Domkirkeani silap pissusii pillugit naalagiartitsinermi peqataalluta, Carsten Siegstad, erinarsoqatigiit januaarimi ataatsimeersuarneranni siulittaasutut qinigaaqqittoq nassuiaavoq.
Aalborgimi, Viborgimi, Aarhusimi, Haderslevimi, Ribemi, Odensemi, Roskildemi, Helsingørimi, Maribomi Københavnimilu domkirkeqarpoq, Aavaallu siulittaasuata neriuutigaa taakkunani siunissami tusarnaartitsisinnaassallutik. 2015-imi 2016-imiluunniit pisinnaanissaat neriuutigineqarpoq. Lund Domkirkemi tusarnaartitsineq apriilip 27-iani 2013-imi pissaaq.
-Attaveqarfigineqarnissarput utaqqiinnarlugu uninngaannarata misiliisariaqarpugut. Domkirkeni marlussunni tusarnaartitsinissarput iluatsissinnaagutsigu nuannissaqaaq, domkirkellu tamakkersinnaagutsigit erinarsoqatigiinnut ajugaanerussalluni. Iluatsitsilluassagutta aningaasassaqartissagutsigullu, Thorshavn Nuullu ilanngutissavagut, Carsten Siegstad oqarpoq.
