Aavaakkut nuuteeraliaat kuultinnattoq

Kalaallit erinarsoqatigiivisa Københavnimi angerlarsimaffeqartut Aavaat nuuteeraliaat 'Qaammarpoq nuna' massakkumut 5.000-inik tunisaqareerpoq. Tussiutit tussiaqattaartutillu juullisiutit pisoqqat nutaallu immiunneqarnerini Mads Lumholt ilaatigut erinnanik aaqqissuilluni suliaqartuuvoq.

Erinarsoqatigiit Aavaat 1996-imi pilersinneqarput, ukiunillu qulinngortorsiornertik malunnartinniarlugu erinarsoqatigiit ’Qaammarpoq nuna’ saqqummersippaat. Immiussinerat taamani 125.000 koruuninik aningaasartuutaavoq, aningaasallu taakku tassa utertinneqareerput. Erinarsoqatigiit nuuteeqqanik tunisaqarnerminni 500.000 koruunit isertissimavaat.

-Angalanermut aningasat atorniartarpagut. Tassa neriukkaluarpugut 2014-imi Canadami ICCp ataatsimeersuarneranut ilaasinnaassalluta, Aavaakkut siulittaasuat Carsten Siegstad oqarpoq.

Erinarsoqatigiit 'Qaammarpoq nuna' tunisaaneranit aningaasat isertissimasatik atorlugit Nuummi ICC-ip 2010-mi ataatsimeersuartitsineranut peqataapput, aamma Bornholmimut angalanerminnut aningaasat ilaatigut atorsimavaat.

Erinarsoqatigiit 'Qaammarpoq nuna'-p saniatigut cd-it allat aamma saqqummersinnikuuaat, soorlu 1999-imi saqqummersippaat 'Erinarsoqatigiit Aavaat'  aamma  'Erinarsoqatigiit Aavaat 2000'. Taakku saniatigut 2008-mi  cd meerarsiut 'Aavaat Qooquaqqat' saqqummersinnikuuaat.

Erinarsoqatigiit Aavaat suliarisimasaat pillugit paasisaqarnerorusukkuit nittartagaat alakkarsinnaavat tassaasoq www.aavaat.dk