Aatsitsiviliornissamut isumaqataasut amerliartoqqilerput
Aluminiumik aatsitsiviliornissamut isumaqataasut amerlerialaarsimasut HS Analysep isumasiuinerata takutippaa. paasineqarpoq, Aatsitsiviliornermi Nunatta aningaasatigut iluaqutigisinnaasaanik isumalluartut amerliartuinnavissimasut isumasiuinermi paasineqarpoq.
Aluminiumik aatsitsiviliornissamik pilersaarut 2007-imi eqqartorneqalermat Nunatsinni innuttaasut taamani paasiniaavigineqartut 950-it missaanniittut 39 procentii tamassumunnga isumaqataalluinnartuupput, ukioq manna affaannanngorsimapput, taamaallaat 18 procentit aatsitsiviliornissamut isumaqataalluinnalersimallutik. Siornamulli naleqqiullugu isumaqataalluinnartut ukioq manna amerlerialaarsimapput. Greenland Development sinnerlugu HS Analysep paasiniaanerata kingorna nalunaarusiaani tamanna atuarneqarsinnaavoq.
Aatsitsiviliortoqarnissaanik isumaqataanngitsut ikiligaluttuinnaraluartut, illuatungaani aatsitsiviliortoqassappat tamassuma Nunatta aningaasarsiorneranut iluaqutaakutsoorsinnaasoq paasiniaavigineqartut arlallit isumaqarput.
Innuttaasut Alcoa pillugu ilisimasaat ukioq manna pitsanngoriaateqarput taamaattorli suliniutip aallarteqqaarneratulli qaffasitsiginatit.
Alcoap Nunatsinni aatsitsiviliornissaa taamani naalakkersuisuusunit 2007-imi, atsiorneqarmat aningaasat katillugit 15 milliardit koruunit missaanniittut Alcoamit atorneqarnissaat ilimagineqarpoq, tassa suliffeqarfissuup sananeranut aamma imeq atorlugu innaallagissiornissamut.
HS Analysep misissuinerani paasinarsivoq, apersorneqartut ataatsimut isigalugu isumaqartut Alcoap aatsitsiviliornera Nunatta aningaasaqarneranut iluaqutaalluarsinnaasoq.
Aatsitsiviliortoqassappalli avatangiisit innarlerneqarnissaannik ernumasut ukiut ingerlaneranni amerliartorsimasut, nalunaarusiami atuarneqarsinnaavoq.
Aatsitsiviliornermi suliffissat amerlineqartussaanerisa apersuutigineqarnerani innuttaasunit amerlanernit isumalluarfigineqarpoq. Tupinnanngitsumik Maniitsumi innuttaasut tamassumunnga neriulluaqaat, taakku sisamaagaagata ataaseq neriulluartupilussuusarluni, apersorneqartullu affaasa tamanna akornutissaqanngitsutut isigalugu.
HS Analyse 2007-imiilli ukiut tamaasa innuttaasut paasiniaavigisarpai aluminiumik aatsitiviliornissaq pillugu pilersaarut qanoq ilisimasaqarfigitigineraat aamma qanoq isumaqarfigineraat.
Ukioq manna misissuineqoktobarimiit novembari ilanngullugu innuttaasut 976-it oqarasuaatikkut apersorneqarput.
