Aatsitassat pillugit suleqatigiinneq nutaaq

Qallunaat aningaasaateqarfiat Industriens Fond, Dansk Industri, Kalaallit Nunaanni Sulisitsisut peqatigiiffiat, GA aamma Danmarks Tekniske Universitet, DTU aatsitassarsiorneq pillugu suleqatigiissitamik pilersitsipput.

Suleqatigiinnissamik pilersitsisuuvoq aningaasaateqarfik Industriens Fond Danmarkimiittoq, 4 million koruuninik aningaasaliilluni.

Kalaallit Nunaanni aatsitassarsiornerup piffissami kingullermi oqallisaallualersimanerata, Industriens Fondip suliniuteqalernera aallartittoq, aningaasaateqarfiup pisortaanerata, Mads Lebech-ip oqaatigaa.

- Kalaallit Nunaata Danmarkillu akornanni suleqatigiinnerup ineriartortinneqarnissaata pingaaruteqassusia aallartippoq, Kalaallit Nunaanni aatsitassarsiornerup oqallisigineqarnerujussuata kingorna.

Aningaasaateqarfiup Industrien Fondip pisortaanera, Mads Lebech oqarpoq.

Taassuma ilanngullugu oqaatigaa, kalaallit qallunaallu aatsitassarsiorneq pillugu suleqatigiinnerisa pilersinneqarneranni peqataasut tamarmik tamanna iluaqutigisinnaammassuk.

- Aatsitassanik pilersaarutit ima annertutigaat, suliffeqarfiit ataasiakkaat kisimiillutik tamanna nammassinnaanagu, taamaattumik suleqatigiittoqartariaqarpoq. Tassalu eqqarsaatip tamassuma apeqqut pilersipaa, tassa qanoq iliornikkut suleqatigiittoqarsinnaava? Aamma teknologi eqqarsaatigalugu, taamaattumik DTU-mik suleqatiseraarput, taakkumi nunami issittumi ilisimasaqarluarmata, Mads Lebech oqarpoq.

Suleqatigiit qaqugu aallartissanersut, Mads Lebechip ima oqaatigaa.

- Neriuutigaarput suliniut erngiinnaq aallartissinnaassasoq immaqa aasami sulinngiffeqareernerup kinguninngua.

Aningaasaateqarfiup Industriens Fondinip piortaanera, Mads Lebech taama oqarpoq.