Aatsitassat Christiansborgimi ataatsimeersuassutigineqarput
Aaqqissuussineq Folketingip katerisimaartarfiani pivoq, professori Minik Rosing ammaalluni oqalugiarluni, naatsorsuutigineqarporlu inuit 130-t missaanniittut peqataasut naatsorsuutigineqarpoq.
Ataatsimeersuarneq Aatsitassanut Ikummatissanullu pisortaqarfimmit aallarnerneqarpoq, Avatangiisit pillugit Danmarkimi misissuisoqarfimmeersut Polar Danmarks Tekniske Universitetimeersullu aatsitassaqarnerup tungaatigut sulianik, periarfissaasunik unammillernartunillu kinguninngua saqqummiussillutik.
Politikerit arlallit ullumi oqallisissapput - Folketingimut ilaasortaatitatta, Sara Olsvigip Doris Jakobsenillu saniatigut ilaatigut peqataassapput Venstremeersoq, Bertel Haarder, aamma De Konservativineersoq, Per Stig Møller.
- Nunatsinni aatsitassaateqarnerput, qanorluunniit iliuuseqarfiginiarlugu aalajangeraluarutta, Nunatta nunarsuarmioqatitta akornanni malugineqarneruneranut sunniuteqarput. Taamaammat pingaaruteqarluinnarpoq aatsitassaateqarnerput politikkikkut nunanut allanut qanoq sunniuteqassanersoq misissussallugu, tamannalu isumasioqatigiinnermi siunertaraarput, isumasioqatigiisitsinissap aallartinngilaattaani Inuit Ataqatigiit sinnerlugit Folketingimut ilaasortaq, Sara Olsvig, oqarpoq.
Isumasioqatigiinneq tamarmi immiunneqassaaq, oqalugiaatit saqqummiussallu Inuit Ataqatigiit Folketingimi nittartagaanut ilineqassallutik.
