Aatsitassarsiutileqatigiiffik: Amerlasuunik oqaloqateqarpugut

Korea Kujallermiut Nalagaaffeqatigiinni maannamut amerlanerpaannik aningaasaliissuteqalersaarput, Greenland Minerals and Energyp, GME-p, Kuannersuarni suliniutaanut 15 milliardi koruuninik akiliillutik pininneqataajumaleramik. Qallunaat aviisiata Berlingskep tusarfini aatsitassarsiornermik suliallit tunngavigalugit taama ullumi allappoq.
Allattoq Jens Thorin
juunip 22-at 2012 12:36

Kisianni ilumut Korea Kujallermiunik milliardilikkaanik aningaasaliisoqaqqajaasoqarnersoq, GME-miit ilomoornerarumanagulu taamaannginnerarumanngilaat, ilumoornerarpaalli Kuannersuarni suliniummut aningaasaleerusuttunut arlalinnut attaveqaramik.

- Tamanna oqaaseqarfigisinnanngilara. Piginneqatigiiffimmi piginnnitsigisatsinni piginneqataassutit, piginneqataqassutinik Australiami niuffaffinni niuerutigineqarput. Tassalu tamakkunani niuffannermi taamaattunik tusagassaqartarpoq. Soorunami ilisimavara, piginneqatigiiffik piginnitserput, aningaasaleerusunnut attaveqartuarmat, ilaallu allanit soqutiginarnerupput. Mannakkorpiarli susoqarneranik oqaaseqarsinnaanngilnga, GME-mi paasissutissiinermut pisortaq Erik Holmsgaard oqarpoq.

Tassumali oqaatigaa, saffiugassanik qaqutigoortunik piiaalernissamut GME-p qinnuteqaatigiumaagaa akuerineqassappat, aningaasaliissutissarpassuarnut pisariaqartunut aningaasaleeqataasussarsiornissaq ajornakusuussasoq.

Taakkualu 15 milliardit koruunit Korea kujallermiut aningaasaliissutiginiarlugit piareersimanerarlugit, Berlingskep ullumi tusarsimasaat, uniuutivissunngillat.

- Oqarsinnaaunga, qaarusuliornissamut misiliillunilu qillerinermut 400 millionit koruunit ukiualuit ingerlanneranni atoreerivut. Ingerlariaqqissaguttalu aningaasarpassuit atortariqarpagut, tassalu milliardilikkaat marlunnik kisitsisitallit eqqartorneqarput. Tassalu nalunanngilaq, aningaasat taama amerlatigisut nunani tamalaani niuffaffinniluunnit pissarsiariniaraluaraanni ajornakusuussaqisoq, Erik Holmsgaard oqarpoq.    

Aningaasarsiornikkut akunnattooqqaneq Nunatsinnilu uranimut naaggaarluinnarneq aningaasanik pissarsiniarnermi aporfiusutut annerpaatut taassumalu taavai.

Iluanaarutilli amerlasinnaapput. Tassami  GME-p misissueqqaarneranit inernerit takutipaat, Kinap ukiumut tunisassiarisartagaasa affaannik Nunatsinni tunissasiortoqarsimaasoq.

Pisiassanik ekektronikkertalinnik, soorlu assiliivinnik digitaliusunik TV-millu isiginnaarutinik saattunik, tamarmik Kuannersuit maammattumik pigisaanik, qaqutigoortunik saffiugassartaqartunik, Korea Kujalleq tunisassiorluartuuvoq.

Greenland Minerals and Energy naliliivoq, taamatut tunisassiornermit Nunatta akileraarutitigut pissarsiassai 1 milliardit koruunit pallisimasagaat.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq