Aatsitassarsiortoqanngippat Nunatsinni aningaasarsiorneq ajalusuussaaq
- Aalisarneq Danmarkimiillu aningaasaliissutigineqartartut, aningaasaqarnerup tungaatigut ineriartortitsinissamut isumalluutigineqarsinnaanngillat, Kalallit Nunaanni aningaasarsiornikkut malunnaatilimmik ineriartortitsisoqassappat aatsitassarsiorneq aallartittariaqarpoq, Martin Kviesgaard oqarpoq.
Taassuma nunatsinni innuttaasut assigalugit Aleqa Hammond-ip suleqatigiligaasalu ukiuni sisamani tullerni politikkeriniakkaminnik saqqummiussinissaat pissanngatigaa.
- Kalaallit Nunaannut aningaasaliinissamut tutsuiginnilersitsinngitsumik, Kalaallillu Nunaata avataaneersunit tutsuiginanngitsutut isumaqarfigineqarsinnaasunik Naalakkersuisut atugassaqartitsisussanngorlutik politikkikkut siunnerfeqassappata tamanna immini Kalaallit Nunaannut aningaasaliisoqarnissaanut aporfiliisuussaaq, tamannalu pitsaasuunavianngilaq - sulimi aatsitassarsiornermik ingerlatsisoqalinngilaq. Aatsitassarsiornerup tungaatigut aallartitsisoqarnissaa pisariaqarpoq, soorunamilu soqutiginarpoq taama pisoqarumaarnersoq, GrønlandsBanken-ip pisortaa, Martin Kviesgaard oqarpoq.
Aatsitassarsiornermillu ingerlatsisoqalinngippat tamatuma kingunerisassai aningaaseriviup pisortaata nalornissutissartaqanngissoraa.
- Aningaasaqarnikkut inissisimaneq allanngortariaqarpoq, isertitsitsissutaasinnaasut nutaat pisariaqarput, taama pisoqanngippat taava inuiaqatigiinni pissarissaarneq appasinnerulissaaq, atugarissaarnerullu tungaatigut ajornerusumik atugaqartoqalissalluni - ilimagisariaqassallunilu Kalaallit Nunaanniit nutserartoqalissasoq. Ullumikkutut pissarissaarneq attattuassallugu akissaqartoqarunnaassaaq, Martin Kviesgaard oqarpoq.
Nunatsinnut aningaasaleerusussinnaasut nujuillisarniaraanni najoqqutassat pisariulluinartuusimagunanngikkaluarput.
- Aalajangiisuunerpaaq soorunami tassaasussaavoq Kalaallit Nunaanni aningaasaliissuteqaraanni aningaasaliissutit pissarsissutigineqarsinnaanissaasa qularnaatsuunissaat. Taavalu aamma piumasaqaatit atugassarititaasut qularnaatsuullutillu allanngorartuunatik patajaatsuunissaat, Martin Kviesgaard oqarpoq.
Martin Kviesgaard-illi isumaa naapertorlugu kukkusumik siunnerfeqarnissamut alloriarnerit siulliit pereersimanissaat ernummatigisariaqarpoq.
- Nalornisitsisoqalereerpoq, qineqqusaarnermiinnaanngitsoq, aamma danskit Folketingiisa misissuisoqarnissaannik noqqaassuteqarsimanerat pissutigalugit, tamakku tamarmik Kalaallit Nunaanni aningaasaliissuteqarnissamut nunarsuup sinnerani nalorngisitsilerput. Nunani allani qisuariaatit takusinnaalereerpagut, tassami Kalaallit Nunaanni suliniutit ingerlateqqinneqarnissaat tunuarsimaarfigineqarnerulerpoq, GrønlandsBanken-ip pisortaa oqarpoq.
Aamma royalty-mik akiliisitsisalerniarnermut tunngatillugu Martin Kviesgaard-ip ernummatigaa, tamanna nunat allamiut aningaasaliissuteqarusukkaluartut nunatsinni aningaasaliissuteqarusussusiannut innarliisimassasoq.
- Soorunami isumaqatigilluinnarparput Kalaallit Nunaanni naleqassutsimik pilersitsisinnaaneq sapinngisamik annerpaajutinniarsarissagipput, kisianni piumasaqaatit royalty-mut tunngasuunersut allamulluunniit tunngasuunersut apeqqutaatippallaanngikkaluarlugit piumasaqaatit erseqqissuujunnaarpata tamanna aningaasaleerusussutsimut aporfiliisunngussaaq, Martin Kviesgaard naggasiivoq.
