Aatsitassarsiornissaq qanilliallappaat
Kuannersuarni, nunarsuatsinni saffiugassanik qaqutigoortunik, uranimik zinkimillu akulinnik pissuussuteqarfiit annersaasa ilaanni, aatsitassarsiortoqarsinnaaneranik misissuinermi teknikkikkut aalajangiisuusumik alloriartoqarsimasoq oqaatigineqarpoq.
Saffiugassap qanoq ililluni aatsitassanit avissaartinneqarsinnaaneranik periaatsit immikkut ittut atorneqarsinnaanerat iluatsittumik misiligarneqarsimasoq, suliffeqarfimmit allaaserineqarpoq. Maannakkullu qanoq ililluni ajornanngitsumik pisariitsumillu Kuannersuarni saffiugassap qaffasissorujussuarmik pitsaassusillip aatsitassamit avissaartinneqarnissaanut periaatsimik nutaamik nassaartoqarpoq.
- Aatsitassanik pisariitsumik avissaartuutsitsineq, aatsitassat pisariaqarluinnartumik sukuluiarneqarnerannut salinneqarnerannullu atatillugu aningaasartuutit angisuumik appartinneqarnissaannut periarfissiivoq, tamannalu ataatsimut aningaasaliissutit eqqarsaatigalugit malunnaatilimmik ikilisinneqarsinnaanissaat ilimagineqarpoq.
Misissuinernit maannamut inernerusut ingerlateqqinneqartut, qaammatip tulliani saqqummiunneqassapput.
Narsap eqqaani aatsitassarsiornissami tamakkiisumik ineriartortitsinissamik takorluugaqarneq GME-p pilersaarutigisaanut taamaalilluni teknikkikkut siuariarneq naapertuuttoq, suliffeqarfiup nalunaarutaani ersersinneqarpoq.
