Aatsitassarsiornissamik qinnuteqassamaalerput
Ingerlatsivissuaq Australiamiut aningaasaanik 20 millioner dollarsinik, tassa 120 millionit koruuninik aningaasaliiffigineqareersorlu, GME-mit taama neriuuteqartoqalerpoq. Aningaasat taakku atorlugit misissuinerit assigiinngitsut maanna naammassineqarsinnaalersut oqaatigineqarpoq. Tamatuma saniatigut qangali pilersaarutaasimasoq, tassalu aktianik niuersinnaatitaalernissamik suliaq naammassineqassalluni.
2007-miilli GME Kuannersuarni qillerilluni misileraalerpoq. Tamatumalu takutippa, Kuannersuarni aatsitassanik qaqutigoortunik annertuumik peqartoq. Tamakku saniatigut zinki aamma uranimik annertunngitsunik aatsitassat ilaat akoqartut paasineqarluni.
Paasisat kingulliit aallavigalugit, GME-p siulersuisuisa decembarimi 2012-imi imaluunniit januaarimi 2013-imi ataatsimiinnerminni qanoq ingerlariaqqittoqassanersoq aalajangiiffigissavaat.
Misissuinerillu inernerisa nalunaarusiorneri naammasseriarpata, taakku Naalakkersuisunut nassiunneqarumaartut tamassumalu kingorna aappimik naaggamilluunniit GME-p qinnuteqaataa nalilerneqarumaartoq oqaatigineqarluni.
Qinnuteqaat aappaagu 2013-ip aallartereernerani nassiunneqarumaartoq GME-mit oqaatigineqarpoq.
Naalakkersuisut qangali naqissusertareerpaat qinnuteqaatip suliarineqarnissaanni, ingerlatsiviup pilersaarutai aamma aatsitassat uranimik akullit ilanngullugit piiarneqarsinnaaneri, qinnuteqaatip suliarinerani apeqqutaajumaartut.