Aatsitassanut Pisortaqarfik: Kingunerisinnaasai misissorneqaqqaassapput
Aatsitassanut Pisortaqarfiup Amerikamiut ingerlatsivianut GXT-imut Tunup avannaani immap iluani qaartitsisarluni uulisiortitsiniarneranut ICC siusinnerusukkut sakkortuumik isornartorsiuisareernikuuvoq. Uuliasiorfissaq imarmiut aasaanerani eqqissisimatitaaffigisarpaat. ICC-ilu malillugu immap iluani qaartitsisarnerup qilalukkat qernertat akornusersorsinnaavai.
Aatsitassanut Pisortaqarfimmi immikkoortortami pisortaq, Jørgen Hammeken-Holm Ingeniøren-imut ullumi oqarpoq, GXT-ip sumiiffinni allanngutsaaliukkani uuliasiortinniarneranut pissutaasoq soqutiginarmat paasinissaa qanoq uuliaqarsinnaatiginera.
Aatsitassanut Pisortaqarfilli suli iluamik akuersissummik tunniussaqanngilaq. Misissuinerummi kingunerisinnaasai misissorneqaqqaassammata, Jørgen Hammeken-Holm ilisimatitsivoq. Taanna naqissusiivoq qaartitsisarluni misissuinerit illersorneqarsinnaassanngippata, ingerlatsivik misissuinissamut akuersissummik tunineqassanngitsoq.
Taamaattorli taassuma GXT-ip sumiiffinni allanngutsaaliukkani uuliasiorluni qillerisinnaanera itigartivinngilaa:
- Aap, imaassinnaavoq kingusinnerusukkut qillerisinnaasut. Sumiiffiimmi allanngutsaaliukkat allanngorarsinnaammata qilalukkanut paasissutissat assigiinngitsut pisagut aallaavigalugit, Jørgen Hammeken-Holm oqarpoq.
Immap iluani qaartitsisarluni misissuinerit aallartissangaluarpata, misissuummi inuit marluk nakkutilliisinneqassapput qilalukkat qernertat qisuariaataannut.
KNR Aatsitassanut Pisortaqarfimmit ICC-p isornartorsiuinera pillugu oqaaseqartitsiniartarnikuungaluarpoq.