Aatsaat taama sualutsigisumik aakkiartorpoq
Tuluk sermersuarnik ilisimatooq, Nunatta sermersuani 100 kilometerinik tiffasitsigisumi qaammatini tallimani paasisassarsioreerluni maanna mianersoqqusivoq.
- Silap kiatsikkiartornerata kinguneranik, aakkiartornera sermersuup ilaanut siaruaassimavoq, aanneratalu kinguneranik imeq aattoq immamut kuuttoq annerulersimaqaluni - ukiup siulianut naleqqiullugu minnerpaamik marloriaatinngorsimalluni, doktor Alun Hubbard BBC-mut oqarpoq.
Taassuma erseqqissarpaa nunarsuup kiatsikkiartornera - imaluunniit minnerunngitsumik Kalaallit Nunaata kiatsikkiartornera - siornatigumut naleqqiullugu aatsaat taama sualutsigisoq.
- Kalaallit Nunaanni nunanilumi issittuni allani aatsaat taama kiatsigitillugu kingumut naammattooqqipparput, Hubbard oqarpoq.
Taamaattorli ilisimatooq taanna isumaqarpoq, kiassuseq ullumikkutut itsillugu ukiut hunnorujulikkaat tuusintilikkaallu qaangiuppata aatsaat aakkiartornera unitsitassaajunnaarluni aakkiartulerumaartoq, taamalu pisoqarpat ajalusoorumaartoq.
Siunissami ajornerpaamik pisoqassappat - tassa sermersuaq tamakkerluni aassagaluarpat - ilisimatuut naatsorsuinerat naapertorlugu nunarsuatsinni imavissuit meterinik arfineq marlunnik qaffariassagaluarput, tamannali siunissami ungasissorujussuarmi pissaaq, taamatullu ineriartortoqarnera nunarsuarmioqatigiit annerusumik iliuuseqarnermikkut, nunarsuatsinni CO2-mik mingutsitsinerup minnerulersinneratigut killilersimaarniarsinnaavaat.
Alan Hubbardip ilisimatuullu suleqataasa ukiup matuma ingerlanerani sermersuarmut uteqqinnissartik naatsorsuutigaat.
