Aataat amii neqaalu Kinamut tuniniarneqaleqaat
Puisit ilaat aataat niueqatigiissutigisinnaanerat pillugu Canadap Kinamik isumaqatigiinninniarnera, Canadami arlalinnit iluarusuutigineqarpoq.
2012 aallartisimaliinnartoq aataap neqaanik, iginneranik amianillu Kinamut tuniniaasinnaalernissaq pillugu isumaqatiginninniartoqarpoq. Canadamiut aalisarnermut ministeriat Beijingimi tusagassiuutinik katersuutsitsinermi oqarpoq, annertuumik Kinamut tunisassiorsinnaalernissaq isumalluarnartoq. Canada aataat amiinnaanngitsoq aammali iginneranik neqaanillu Kinamut tunisassiuleraluarpat tamanna dollarinik miliuunerpassuarnik kaaviiaartitsinermik kinguneqarsinaavoq. Canadamiut aalisarnermut ministereqarfiata isumaqatigiissusiornissaq ukioq ataaseq sinnerlugu piareersarsimasaa sapaatip akunerani uani piviusunngorpoq. Canada nunanit siullerpaajulluni aataap neqaanik tunisassiornissaq pillugu Kina naalagaaffittut isumaqatigiissuteqarfigaa.
New Foundlandimi piniartut CBC-mut oqarput kiisami iluamik aningaasarsiorsinnaalernerminnik isumaqatigiissuteqarnerup kinguneqarsinnaanera isumalluarfigalugu.
Inuit Tapiriit Kanatami præsidentiat, Mary Simon tusagassiuutitigut nalunaaruteqarnermini nutaarsiassaq tusarluarnartoq naggueqatigiit Inuit tamarmik nuannaarutigiumaaraat, aningaasatigullu iluanaarutigineqapallannissaa neriuutiginerarpaa, uumasunillu illeruiniaqatigiiffiit eqqunngitsunik paasissutissiiniartarnerat Kinamiut upperinngimmassuk aamma nuannaarutiginerarlugu, Canadami suleqaterput Marianne Stenbæk taama tusagassiivoq.
