Aasivilerisarneq aallarteqqippoq
Aasiviup pilerseqqinniarneranut siunertaavoq inuiaqatigiit anersaartorfissaqarlutillu ataatsimoorfeqarnissaat. Ukiut tamaasa illoqarfinni assigiingitsuni pisassaaq, Aasivilerisut pilersinneqarnerminni ilaatigut taama siunertaqarput.
Aasivik piorsarsimassutsikkut, ilisimatussutsikkut ataatsimornikkullu pissarsiffiunissaa takorloorneqarpoq. Imigassartaqanngitsumik aanngajaarniutitaqanngitsumillu meeqqaniiit utoqqarnut naapiffittut atorneqassasoq aamma siunniunneqarpoq.
Nuummi Aasivilerisut pilersinneqarmat politikkikkut anguniakkat aamma aalajangersarneqarput. Tassanilu pingaartinneqarpoq suliniaqatigiiffiup partiimut arlaannaannulluunniit pituttorsimanngitsuunissaa. Taamaattoq nammineq politikkikkut aamma oqariartuuteqarput.
- Pingaartinneqartut ilagaat kulturikkut pigisatta, soorlu aalisarnermi piniarnermilu ilisimasat misilittakkallu meeqqanut inuusuttuaqqanullu ingerlateqqinnissaat. Aamma eqqumiitsuliornerup iluani, soorlu isiginnaartitsinermi, nipilersornermi allarpassuarnilu, minnerunngitsumillu timersornikkut oqallinnikkullu immersoqatigiinnissaq takorluukkat ilagaat, Nuummi Aasivilerisut ilaatigut taama anguniagassipput.
Ataatsimiinnermi aalajangiunneqarpoq Aasivik juulip 21-aniit sapaatit akunnera ingerlanneqassasoq.
Aasivik Nuummi siulersuisoqalermat alloriaqqittoqarsinnaanngorpoq.
- Siullermik kommuunimut peqatigiiffinngornerput nalunaarutigineqassaaq. Siulersuisut ataatsimiinneratigut Aasiviup sumiiffissaa aalajangiunneqassaaq. Taassumalu tullerissavaa aningaasartuutissat missingersuusiornissaat tamatumalu kingorna aningaasaateqarfinnut qinnuteqarnissaq, Najaaraq Møller Nuummi Aasivilerisuni siulittaasunngorlaaq KNR.gl-imut oqarpoq.
Peqatigiiffiup aqqa tassaalerpoq, "Nuummi Aasivilerisut".
Siulersuisutullu toqqarneqartut ukuupput:
Najaaraq Møller, siulittaasoq
Karsten Heilmann
Tola R. Carlsen
Ivinguák S. Høegh
Nunni Navaranaaq Olsen
Arnannguaq Eldevig
Georg Olsen
Sinniisussat:
Per Rosing-Petersen
Ane Berthelsen
Nuummi Aasivilerisunit neriuutigineqarpoq sineriammi peqatigiiffiliortoqassasoq, tamatuma kingunerisinnaammagu nuna tamakkerlugu suliniaqatigiiffiup kattuffeqalernissaa.
