Aasivik silagissuup ataani ammarneqarpoq
Angallatit 60-nit amerlanerit Kapisillit ungasinngisaannut Ikkarlunnut takkupput Aasivik 2012 arfininngornermi ammaanersiorneqarmat.
Leif Immanuelsen aamma Peter Larsen aasarsioqatigiinnermik ammaallutik qilaatersorput Aasivik 2012-mi siulittaasup Najaaraq Møllerip ammaalluni oqaaseqannginnerani.
Aasiviup qulequtaraa Inuiattut killiffik oqallinnerillu sapaatip akunnerata ingerlanerani pissapput arfininngorpat tullianik toqqit atortullu allat poortorneqannginneranni.
Ammaanersiornermilu silagissuaq eqqorneqarpoq. Anoreqanngingajattumik ippernat qittateqataapput. Ammaanersiornerullu kingorna puisit neqaat, umimmaat neqaat, eqaluillu uullineqarput piumasut aalleriarlutik grillersinnaassaat. Grillerivissuarlu Qoornumi borgmesterissarsiortarnermit arlallit eqqaamagunagaat atorlugu grillerisoqarpoq.
Ammaanermi aliikkusersuisoqarluarpoq erinarsoqatigiit Qissiat Ida Heinrichilu erinarsormata. Aamma ileqqorsuutinik erinarsuataartoqarpoq Nuummi aliikkusersuisartut NAIPp peqataaffigisaannik.
Aaqqissuisut allattuiffilerlutik angalaarput inuit najuuttut aterminnik allaffigisinnaasaannik arfininngornallu inuit 300-ut sinnillit atsiorsimasut aaqqissuisut unnersiorput.
Assigiinngitsunik atortulersortoqarsimavoq allaffeqarluni, igaffeqarluni, sceneqarluni perusuersartarfeqarlunilu aasinerup sapinngisamik atoruminartuunissaanik qulakkeerisunik.
