Aasiit Nuummi aalakoorluni biilertoqarpoq
Angutip nalunngisami biilia tillissimavaa, tillinnerlu akiligassiinermik kinguneqassaaq. Aammalu biilersinnaanermut uppernarsaammik peqannginnini akiligassaqaatigilissavaa. Biilernermini aalakoorsimavoq. Aqqusinikkut ingerlaarnermi maleruaqqusanik unioqqutitsinerit arlaqarput, tamakkulu tamaasa angutip akiligassinneqarneranik kinguneqassasut, Nuummi politiit nalunaarutigaat.
Aalakoorlutik biilertut katillugit pingasut arfininngornerup unnuaani tigusarineqarsimapput. Taakkulu nalunaarsuinernut ilanngukkaanni, sapaatip akunnerisa naaneranni tamatigut marluk akiligassinneqartarnissaat naatsorsuutigineqarsinnaasoq, Nuummi politiinit ilanngullugu oqaatigineqarpoq.
Aalakoorlutik biilertut unitsinneqartartut aavinni aalakoornartoq promille annertuneq ajoraluarpoq. Vicepolitikommissærilli Niels Nyvangip, aalakooreernerup aqaguani biilinnginnissaq inassutigaa:
- Unnuaq tamangajaat imereernermi timimi aalakoornartoq suli annertusarpoq. Tamannalu inuit amerlanersaasa puigortarunarpaat. Taamaattumik arfininngornerit tamaasa biiliertunik unitsitsilluta misissuisalernissarput aalajangiupparput, Niels Nyvang oqarpoq.
Aalakoorlutik biilertut aqqaneq marluk Nuummiinnaq ukioq manna paasineqareersimalerput. Siornamut naleqqiukkaanni kisitsisit Niels Nyvangip allanngungaarsimannginnerarpai.
