Aasianni utoqqaat illuat unnuaq tillinniarfigineqartoq

Aasianni politiit Utoqqaat Illuannut tillinniartoqarsimaneranut atatillugu ilisimannittunik ujaasipput.

- Unnuaq tallimanngornerup unnuaani nal. Marluk arfineq-marlullu akornanni Aasianni utoqqaat illuanut allaffimmut tillinniartoqarsimavoq. Tassanngaanniillu pengeskabiminngaanniit hævekortit pinkodertallit, utoqqaat illuani ineqartut pigisaat tillinneqarsimapput.

Nuunu Andersen Larsen, Aasiaat politiivineersoq, taama oqarpoq.

Aasianni Utoqqaat Illuanni tallimanngornerup unnuaani tillinniartoqarsimasoq nalunaarutigineqarpoq, aningaasivik hævekortinik 20-t missaanni pinkodetalinnik, utoqqaat illuanni najugaqartut pigisaannik imalik tassani tillinneqarsimalluni.

Aasianni Politiit suliamut atatillugu misissuileruttorput, tassungalu atatillugu takunnissimasinnaasunik ujartuillutik.

Tassunga atatillugu Aasianni politiit attaveqarusupput ilisimannittunut aamma ilisimannittunik nalunngisaqartunik attaveqarusupput.

Qanoq ililluni tillinniartoqarsimanersoq, Nuunu Andersen Larsenip sukumiinerusumik oqaaseqarfigisinnaanngilaa:

- Oqaatigisinnaanngilara qanorpiaq pisoqarsimanersoq, kisianni allaffimmut isertoqarsimavoq, paasiniaanerput najoqqutaralugu oqaatigisinnaanngilara, qaqutut qanorlu aningaasivik ammarneqarsimanersoq.

Nuunu Andersen Larsen, Aasiaat politiivineersoq suleqatitsinnut Jens Betakimut taama oqarpoq.

Kortit tillinneqartut 20-t missaanniittut atorneqarsimanersut annerusumik taassuma aamma oqaaseqarfigisinnaanngilaa, kortilli matuneqarnisssaannut Aasianni Utoqqaat Illuanni sulisut siunnersorneqarnikuusut taanna oqarpoq.

Aasianni innuttaasut tillinniarnermut ilisimasaqartut, pinerluttullu kinaaneranik ilisimannittut qinnuigineqarput politeeqarfimmut nammineq ornigullutik, politiinulluunniit sianerlutik saaffiginnissasut. Aasianni politiit oqarasuaataasa normoraat 70 14 24.