Aasianni umiarsuliavik: 25 millionit ilaartuineruinnarput

Naalakkersuisut nuna tamakkerlugu umiarsualivinnut aserfallassimaqisunut kinguaattoorutaat 270 millionit koruuniupput. Taakkunannga Aasiaat umiarsuliaviat nunatsinni suliassaanerpaalluni 45 millionit koruuninik siorna atorfissaqartitsivoq.

Naalakkersuisulli nuna tamakkerlugu umiarsualivippassuit aserfallatsaalinissaannut aappaagumut millioninik 25-nik imikkoortitsilersaarput. Taakkua Kommune Qeqertaliup borgmesteriata sullugeqai. Aasiaammi umiarsualiviata pitsaanerulernissaa kissaatigaa.

- Pinngitsuuinnani suliarineqarnissaa tikinneqarnikuuvoq. Taamaattumik 25 millionit taakkua kisiisa isumalluutigissagaanni ilaartupalaaginnarneqarsinnaavoq taamaallaat, Inuit Ataqatigiinneersoq, Ane Hansen KNR-mut oqarpoq.

AAMMA ATUARUK Umiarsualivinnut amigaatit 270 koruunit milliuunit

Aasiaat umiarsualiviat ukioq kaajallallugu ulapaarfiuvoq. Nioqqutissanik avannamut pilersuinermi, aalisakkanillu tunisinermi pingaaruteqartuulluni. Aamma umiarsualiviup saava itissusigissuuvoq.

Taakkualu peqqutigalugit umiarsualivimmi suliassaqartuarnissaa, Kommune Qeqertaliup borgmesteriata ilimagaa, inuussutissarsiornikkullu periarfissaqarluartutut isigaa.

Borgmesteri: Ilaartuipalaaginnartoqassanngilaq

Taamaattumik Aasianni umiarsualiviup nammineq ingerlatseqatigiiffittut ingerlasunngornissaa, borgmesterip siunnersuutigaa.

Taamaaliornikkut aserfallatsaaliineq ilaartuipalaariinnarani naammassineqarluarsinnaasoq taanna isumaqarpoq.

- Ingerlatseqatigiiffiliortitsinerit eqqarsaatigineqarsinnaasut, suliassaq pitsaanerusumik, sukumiinerusumik iluittumillu suliarineqarnissaa siunertaralugu, Ane Hansen oqarpoq.

Umiarsualiviit Namminersorlutik Oqartussat pigaat. Assigiinngitsuniilli ulluinnarni ingerlanneqarput. Nuummiittut SIKUKI-mit aqunneqarput, inoqarfinnili allani amerlasuuni Royal Arctic Line ingerlatsisuuvoq.

Naalakkersuisoq: Pisortatigoortumik saaffiginnigit

Attaveqaasersuutinullu naalakkersuisup oqarnera naapertorlugu borgmesteri kissaamminnik pisortatigoortumik, suli apuussinngilaq. Apuussinissaali kaammattuutaavoq.

- Taava namminneq ingerlatseqatigiiffittut ingerlatserusukkunik taanna uagut tikilluaqqorusukkatsigu periarfissanillu ujartueqataarusulluta, Siumumeersoq Erik Jensen oqarpoq.

Umiarsualivinnik aappaagu iluarsaanissamut amerlanerusunik aniungaasaliinissaq Inatsisartuni partiit kissaatigigunikku aningaasanut aappaagumut inatsisissamut isumaqatigiinniarnerni naammassisinnaagaat attaveqaasersuutinut naalakkersuisoq aamma oqarpoq.

Ilulissani umiarsualivik iluarsartuunneqarnissamut kinguaattoorutini aningaasartuutaanerpaassussap tulleraa. Ilulissani umiarsualivimmut 41 millionit koruunit kinguaattoorutaapput.