Aasianni ukiormanna festivalertoqarnissaa iluatsinneqarpoq!

Nipilersornikkut pikialaartitsineq taanna, ukiut tamaasa Qeqertarsuup Tunuani nipilersornikkut katersuuffiusarpoq, tusarnaariartartullu aalajaatsut ukiap ukiullu taarnerata nalliutinnginnerani naggammik nipilersornikkut immersortikkiartorlutik Kangaatsiamit, Qeqertarsuarmit, Ilulissanit, Qasigiannguanit nunaqarfinniillu umiatsiamik Aasiannutarput.

Nipilersortartup, nipilerisup immiussisartullu nunatsinni ilisarisimaneqarluartup, aasarlu Aasiaat illoqarfiata ukiunik 250-nngortorsiorneranut atatillugu kommunimit Kulturikkut nersornaammik tunineqartup Bent Ole Brandtip, Qeqertarsuup tunuani nipilersornikkut pikilialaarnermik nuannarisallit annaappai. Aasiaat illoqarfittut ukiunik 250-inngortorsiorneranut atatillugu 'Aasiaat 250 Festival-'imik taasamik aaqqissuivoq.

- 'Aasiaat 250 Festival'-imik taavarput, suli qaangiutinngimmat Aasiaat nalliuttorsiornera. Nipiaa Rock Festivalernianngitsut tusarakku ajuallalaariarlunga isumaqalersimavunga susassaqartut katersorniarlugit, tamannalu iluatsippara, pikialaartitsinissamik aallarniisoq Bent Ole Brandt oqaluttuarpoq.

Taamaasillunilu ulluni tallimanngornermi aggustip 30-iani arfininngornermilu aggustip 31-iani tusarnaartitsisoqartussanngorpoq. Kalaallit nipilersortartut nuannarineqarluartut arlallit Aasiaat Timersortarfissuani appissapput.

- Suliassat agguataariaratsigit, sinnera isummaminik ingerlalerpoq. Nipilersortussat ajornaateqarpallaanngitsumik katersorpakka, immaqami aamma nalunngisarilluariarakkit aperisakka tamarmik piumapput. Kisianni uggornarpoq Qeqertarsuarmiunik aperisaqarnangalu nipilersortussat naammassigakkit, nalunanngitsumik iluatsippat qaquguussanerpoq Qeqertarsuarmiunik minitaqaqqissananga, Bent Ole Brandt oqarpoq.

Aasianni nipilersornikkut nuannatsitsineq Ole Kristiansenertaqanngitsoq suua? Ole Kristiansen tassaavoq nunatsinni poprockimik nutaaliaasumik 90'kkunni tusaamasanngortitsisoq - sulilu ingerlarsortoq. Nunanut assigiinngitsorpassuarnut tusarnaartitsiartortarsimavoq, aammalu kalaallit nipilersortartut ikitsuinnaat angusaannik Roskilde Festivalimi tusarnaartitsisimalluni. Kalaaleq nipilersortartoq tusaamasaq. Ole Kristiansen Aasiaat nipilersornikkut oqaluassartaata nutaajunerusup ilagilluinnarpaa, nipilersornikkut oqaluttuarisaaneq imartooq siammasissorlu. Ado Lyngep nutsugiarluni kalattuunik nipilersugaanit, Inneruulamut Qeqquamullu, Isummat Pilu Lyngelu, Fiassuit, Stinne Jakobsen Kimmernarlu. Aap, taasassat amerlaqaat, Aasiaammi nunatsinni nipilersornikkut ineritaqarfiunerpaavoq. Tamannalumi aamma ulluni marlunni tusarnaartitsisoqarnissaanut pilersaarummi ersarippoq, nipilersoqatigiinnit nipilersortussanit arfineq pingasuusunit sisamat Aasiammiuupput.

Tusarnaartitsinissamut pilersaarut:
Aasiammiu arnaq inuusuttunnguaq Aviaq Grønvold tallimanngornermi aallarnissaaq, kingorna Aasiammioqataa Søren Alaufesen appissalluni, tullerissavaa Martin Løvstrøm, Nuuk, unnullu naggaserlugu Ole Kristiansen nipilersoqataalu tusarnaartitsissapput.

Nuannanneq arfininngornermi nangissaaq. Aliikkusersuillutik nipilersoqatigiit Kalak Jazz Ilulissaneersut ammaassapput, nuannarineqarluartut Qeqquaq, Aasiaat, tulleralugit, taava Diskobay Blues, Ilulissat, nipilersussapput, naggataatigullu, minnerunngitsumillu, nuannarineqarluartoq Mariina Qasigiannguaneersoq Aasiaat 250 Festival naggaserlugu tusarnaartitsissaaq.

Matut nal. 21.00 ammarneqassapput, ulluni tulleriinni, tusarnaartitsinerillu nal. 22.00 aallartittassallutik. Iserneq 250 koruuneqassaaq unnummut ataatsimut.