Aasianni ujajaasut eqqartuunneqarput
Eqqartuunneqartunit arfiniliusunit tallimat qaammatit arfineq marluk angullugit pineqaatissinneqarsimasut inissiisarfianniittussanngortinneqarput, ataaserli 17-inik ukiulik, ukiukinninini pissutigalugu inunnik isumaginnittoqarfimmit nakkutigisassanngorlugu eqqartuunneqarluni.
Ujajaaneq pivoq oktobarip aallartilaarnerani suliffeqarfiup entreprenørfirmaet Egedesmindep inissiaataani Aasianni.
Taamani ujajaasut suliffeqarfiup inissiaataanut, suliffeqarfimmut atasumiittumut, igalaaq aserorlugu iserput. Inissiami najugaqartoq angut 69-inik ukiulik saassunneqarpoq immiaaraataalu karsit arlallit oqarasuaallu angallattagaq tillinneqarlutik. Ujajaasut erngerlutik qimaapput, ullulli tullii tulleriaarlutik tigusarineqarlutik.
Sapaatip akunneralu kingulleq ulluni marlunni eqqartuussisoqareernerata kingorna ujajaasut Aasiat eqqartuussiviani, suliassami uani Sømandshjemmimut nuunneqarallarsimasumi, eqqartuunneqarput. Eqqartuussivimmimmi unnerluunneqartut tamarmik illersuilu inissaqartinneqanngimmata.
Eqqartuussinissamut atatillugu illersuisutut ilinniarsimasut Qaanaamiit, Nuummiit, Ilulissaniit Sisimiuniillu tikisinneqarsimapput, illersuisoq ilinniarsimasoq Aasianneersoq ataasiinnaammmat.
Ujajaasut marluk, angut inuusuttoq 19-inik ukiulik arnarlu 20-nik ukiulik, tamarmik eqqartuunneqarput qaammatini pingasuni pinerlussimasut inissiisarfianniittussanngorlugit, tamatumalu kingorna pinerluttunik nakkutilliisoqarfimmit ukioq ataaseq nakkutigineqartussanngorlguit. Angut alla 21-inik ukiulik qaammatini tallimani pineqaatissinneqarsimasut inissiisarfianniittussanngortinneqarpoq. Unnerluunneqartullu kingulliit angutit marluk, tamarmik 20-it qaangerlugit ukiullit, qaammatini arfineq marlunni pineqaatissinneqarsimasut inissiisarfianniittussanngortinneqarput. Taakku ujajaanermik saniatigut piliarisimasaminnut allanut aamma eqqartuunneqarput.
Unnerluussisut eqqartuussisunut unnerluutigineqartut ukiumi ataatsimi aamma qaammatit 15-it akornanni pineqaatissinneqarsimasunut inissiisarfianiitinneqarnissaat innersuussutigisimagaluarpaat.
Taamaattumik eqqartuussiviup aaliangiinera Nunatta Eqqartuussivianut ingerlateqqissanerlugu unnerluussisut ullut makku eqqarsaatigaat.
Eqqartuunneqartup ataatsip aalajangerneq Nunatta Eqqartuussivianut ingerlateqqissimavaa.
