VIDEO Aasianni kommunimi sulisut: Qaasuitsup Kommuniani sullissineq arriippoq
- Isumaqatigisinnaavakka innuttasut, immaqa qangamut naleqqiullugu avammut sullissineruneq annikilleriaateqarnikuuvoq. Allaffissorneq annertuseriarnikuugami, Judithe Petrussen, Aasianni isumaginninnermi immikkoortortaqarfimmi aqutsisoq oqarpoq.
- Ukiuni kingullerni pingasuni sisamani malunniunnikuuvoq utaqqikatallutik naammagittaalliutit annertusut, Otto Sandgreen, Aasianni sanaartornermik avatangiisinullu ingerlatsivimmi aqutsisoq KNR-imut oqarpoq.
Aamma atuaruk Aasianni innuttaasut kommunimit sullissinerup pitsaanerulernissaa qilanaaraat
Aasiaat Kommuniugallarmat nunaqarfinni inunnik isumaginninnermut sullissisuusimasut ikilisarneqarput, tamatumalu kingunerisaanik inunnik sullissineq arriinnerulerpoq.
- Isumaginninnermi ikiortit piiarneqarmata, immaqa aapperneqaqqissinnaagaluartoq angummannerussaguni sullitaminut. Qaninnerusumillu sullississaguni immaqa pitsaaqutiginerpaasimassagaluarpaa marluugaluarunik.
- Taamaattumik taanna eqqaariigarput, innuttaasunut ungasillinerulernikuuvugut, aamma pinngitsoorata pisussaagatta nalunaarsussallugit saaffiginnittut tamaasa, allaffissorneq piffissaqarfigineqartariaqarmat saniatigut annertuumik, Judithe Petrussen oqarpoq.
Aamma atuaruk IA: Qaasuitsup Kommunia manna avinneqaruni akisuallaassaaq
Otto Sandgreenip immikkoortortaqarfiani sulineq allanngorpoq, soorlu nunaminertanik qinnuteqartut utaqqinerusalersimapput.
Aammali suleriaatsit illoqarfimmut tulluussakkat kommunerujussuarmi suleriaatsit assigiissaarnerisa kingorna atorunnaarsinneqarput. Soorlu Aasianni pisoqarfiusimaqisumi inunnik isumaginnittut sukkulluunniit ikiuigasuarsinnaasut atorunnaarsinneqartut.
- Tassa ulloq unnuarlu taamannak anisarnerput atuukkunnaarnikuuvoq. Sillimasoqarpugut, isumaginnittoqarfik matugaangat sillimasoqartuaannarpugut, taannalu meeqqanut inuusuttuaqqanullu 18-it ataallugit ukiulinnut piareersimasutut sillimasorivarput.
- Kisianni pisoqarsimagaangat, soorlu politiit pisariaqartitsigaangata iliuuseqarasuartoqarnissaanik, taannaasarpoq ilaqutariinni alakkaasoq, ilisimatitsiartorluni ikiorneqarumaartut piffissaq nallepat, tassami soorlu sulineq naliginnaasumik aallartippat, Judithe Petrussen nassuiaavoq.
Naalakkersuisut naalakkersuisooqatigiinnissamut isumaqatigiissutaanni Qaasuitsup Kommuniata marlunnut avinneqarnissaa sulissutigineqassasoq allaqqavoq.
