IA: Qaasuitsup Kommunia manna avinneqaruni akisuallaassaaq
Qaasuitsulli Kommuniani borgmesterip, Ole Dorphip ukiortaami oqaaseqaammini neriorsuutigaa, Naalakkersuisooqatigiit isumaqatigiissutaat malillugu, Qaasuitsup Kommuniata marlunngorlugu avinneqarnissaa siunniunneqartoq aamma kommunimi innuttaasut qanimut oqartussaaqataanerannut naleqquttumik kommuni aaqqissuunneqassasoq neriorsuutigalugu.
Tamannali pitinnagu Nunatsinni kommunit sisamaannanngortinneqarnerisa kinguneranik aaqqitassat aaqqeqqaarneqartariaqartut siulliunneqartariaqartut, Qaasuitsup Kommuniani kommunalbestyrelsemut ilaasortaq, Ane Hansen, Inuit Ataqatigiit oqarpoq.
Aamma atuaruk NALILIINEQ Kommuninik aaqqissuusseqqinnissaq Siumup kisermaappaa
- Misissuinissaq nalilersuinissarlu pingaaruteqarput tassami kommunini allani kommunit avinneqassappata, kommunit ilaat aningaasatigut nammatakinnerusut artukkerneqaannartussaapput ilaallu atugarissaartinneqarnerulerlutik. Taamaattumik nammaqatigiinnissaq pisariaqarpoq, Ane Hansen oqarpoq.
Naalakkersuisooqatigiit isumaqatigiissutaat imaalillugu Uummannaq, Upernavik aamma Qaanaaq immikkut kommuninngussapput, taamatullu Qeqertarsuup Tunuani illoqarfiit angisuut eqqarsaatigalugit taakku kommuni suleqatigalugu eqqartorneqassallutik. Tassani pineqartut illoqarfiit tassaallutik Ilulissat, Qasigiannguit, Qeqertarsuaq, Aasiaat aamma Kangaatsiaq.
Aamma atuaruk Borgmesterit ukiortaami oqalugiaataat 2015 - Qaasuitsup Kommunia 01.01.2015
- Taamatut avinneqassappata kommunit marlunngortut nammaqatigiinnissaannik nalilersuinissat arlaqassapput. Aamma eqqarsaatigisariaqarpoq, Nunatta maanna aningaasaqarnera eqqarsaatigalugu taama avitsiinnarnissaq pisariaqarnersoq. Tassami aamma suli takusaqanngilagut kommunip avinneqarnissaanut suut tunngavilersuutaanersut.
Ane Hansenip aamma oqaatigaa, kommunip avinneqarnissaanik eqqarsarnermi kommunip pitsaasumik ineriartornissaraluinut tamanna akornutaaginnalersimasoq.
- Kommunitsinni pitsaasumik ineriartorusuppugut tamannalu eqqarsaatigalugu Naalakkersuisut susoqarnissaanik ersarissumik maanna nalunaartariaqalerput, Ane Hansen oqarpoq.
Borgmesterip ukiortaami oqaaseqataa ersarinngilaq
Tassalu Naalakkersuisunngorlaat suleqatigiinnissaminnut isumaqatigiissutiminnut atatillugu avammut nalunaarutigaat, kommunimut piumaffiginnillutik kommunip qanoq avinneqarnissaanik kommuni siunnersuusiussasoq. Tassalu tamannarpiaq borgmester Ole Dorphip ukiortaami oqaaseqaammini aamma ilanngullu taasaa.
- Borgmesterip ukiortaami oqaaseqaammini sunarpiaq eqqartorneraa paaseqqaartinnagu, Inuit Ataqatigiinniit tamakkiisumik oqaaseqarfigissallugu maanna suli piffissaanngitsutut taasariaqarpoq. Tassami nalunngilarput borgmesterip tulliatalu taamatullu taakku parteeqataasa kommunip avinneqarnissaa akerlerinikuugaat. Taamaattumik taakku pineqartut nalorninerisa ersarissarneqarnissaat maanna pisariaqalerpoq.
Qaasuitsup Kommuniani kommunalbestyrelsemut ilaasortaq, Ane Hansen (IA) taama naggasiivoq