Aasianni isikkammik arsaluni festivali

Festivaalilli pinnginnerani tallimanngornermit isikkammik arsarnermik sungiusaasut, Qeqertarsuarniit, Kangaatsiamiit, Aasianniit, nunaqarfinniillu Akunnaamit, Kitsissuarsunnit, Ikamiunit, Kangerlummit, Attumit, Iginniarfimmit, Ikerasaarsummit, kiisalu Niaqornaarsumminngaannersut  Danskit FIFA-mit ilitsersuisuannit Troels Gaarboimit pikkorissartsinneqaqqaassapput.

-Sungiusaasut aqutsisuusartullu amerlanersaat angajoqqaajusarput, meeqqamillu ukiui malillugit sungiusaasarput. Maannalu pikkorissartitsinissami neriuutigaarput ilitsersuisutut ilinniartsinneqartussat meeqqanut amerlasuunut ataatsikkut ilinniartitsisinnaalerumaartut. Taamaallillutimmi aamma meeqqat peqqinnartumik sunngiffimmi sammisassaqartinneqarsinnaapput, Jens Tang Olsen Kalaallit Nunaanni sungiusaasut ilinniartsinneqarnissaannut akisussaasuusoq taama oqarpoq.

Sungiusaasunut pikkorissartitsineq qaangiuteriarpat peqataasut ilitsersuisutut ilisimalikkatik nutaat atorlugit Aasianni isikkammik arsarluni festivalimi ilitsersuissapput. Kingornalu sumiiffinni aggerfigisaminni GBU- Coca Cola akisussaaffigalugu aaqqissuutissavaat.

-Meeqqat festivalimut peqataasussat nalunaaquttap akunerini marlunni sammisassat arfinillit arfineq pingasullu akornanniittut pinnguaatigissavaat. Taamatullu aaqqissuinitsinni neriuutigaarput meeqqat timersornermik sammisaqarnerulernissaat, isikkammillu arsarnermik soqutiginnilersinnaanerat siunertaasinnaavoq. Pingaarnerpaavorli ataatsimoorluni timersuutinik kinguariit nutaat soqutiginnilersisinnaanerat, tamatumani assammik isikkammilluunnit arsarnerugaluaruni soqutaanngilaq, Jens Tang Olsen, Danmarkimi Fredrikshavnimi najugaqartoq maanna Nunatsinniittoq taama naggasiivoq.