Aasianni inissiat portusuut nutaat: Inissianik nutaanik 60-inik sanaartortoqassasoq
Aasianni sanaartortoqassaaq. Inissiani portusuuni quleriiaannik tallimanik portussuseqartuni inissiat 60-it sananeqassapput. Aapppaagu maajimi sanaartortoqalissaaq.
Kommune Qeqertaliup inissiat 40-t nammineerluni aningaasaliiffiginiarpai. Namminersorlutik Oqartussat inissiat sinneruttut 20-t akilerniarlugit.
AAMMA ATUARUK Ane Hansen siulittaasunngortoq
Aasianni inissiat portusuut siulliit nutaat sanaartorneqarnissaat Kommune Qeqertaliup borgmesteriata, Ane Hansenip (IA) nuannaarutigaa.
Inissiat portuut pingasut nutaat:
Kommune Qeqertaliup aningaasaliiffiginiagai:
Inissiat marlunnik initallit 30-t.
Inissiat pingasunik initallit 10-t.
Namminersorlutik Oqartussat aningaasaliiffiginiarpai:
Inissiat marlunnik initallit 10-t.
Inissiat pingasunik initallit 10-t.
- Naalakkersuisoq suleqatigiinnissamut isumaqatigiissuteqarfigisinnaagakku nuannaarutigaara, ingammik Aasianni massakkut illoqarfimmi najugaqarfiit qaninnerulernissaat, illoqarfiup kusanarnerulernissaa Aasiannilu nutaaliortoqalernera, borgmesteri tusagassiuutinut nalunaarummi oqarpoq.
Kommunip oqarnera naapertorlugu inissiat nutaat inissaaleqisut amerlassusaannut ikilisaataassapput.
Aasianni INI A/S-imi inissarsiortutut allattorsimaffik naapertorlugu inissarsiortut maajimi 323-upput. Naatsorsueqqissaartarfik naapertorlugu inuit 3.069-it Aasianni najugaqarput.
Namminersorlutik Oqartussat inissiat portusuut Namminersorlutik Oqartussat sanaartornermik malitassiaat nalinginnaanngorsagaq malillugu sanatinniaraat, Naalakkersuisut allapput.
Tamanna ineqarnermut attaveqatigiinnermullu naalakkersuisup, Karl Frederik Danielsenip nuannaarutigaa:
- Inissiat nungusaataanngitsumik aallaaveqarluni sanaartorneqarnissaat, taamaalillunilu kissamut innaallagissamullu aningaasartuutissat, kiisalu siunissami attartortussat ingerlatsinermut aserfallatsaaliuinermullu aningaasartuutissaasa ikilisarneqarnissaat nuannaarutigisorujussuuara.
- Tamatuma peqatigisaanik isumaqatigiissutigaarput, suliassaq najukkami sulisartunik atuiffiusussaq najukkami sulliffissaqartitsinissamut iluaqutaangaatsiassasoq, naalakkersuisoq tusagassiuutinut nalunaarummi oqarpoq.
Nuanneq – kisianni suliassat ataatsikkoortut amerlavallaarput
Sulisitsisut Aasianni immikkoortortaqarfiani siulittaasup, Ove Hansenip inuussutissarsiornermi ilaasortaasa inissialiortitilernissaat nuannaarutigaa.
- Nuanneq. Kisianni suliassat taama amerlatigisut ataatsikkoortinneqassanngitsut politikerinut oqaatigerusunnarpoq, Ove Hansen oqarpoq.
AAMMA ATUARUK Kommune Qeqertalimmi sanaartornermik suliffeqarfiit: Suliassaaleqivugut
Taassuma Kommune Qeqertalimmit sanaartornermik suliffeqarfinnut suliassaqannginnera pissutigalugu kommune ukioq manna siusinnerusukkut isornartorsiorpaa.
Tassumami suliassaaleqisoqarnera pissutigalugu sanaartugassanik suliassinneqartartuni sanasullu suliffeqarfiini soraarsitsiortortoqartariaqarsinnaanera ernumagisimavaa.
- Kommune Qeqertalimmi sanaartornermik suliffeqarfiit ajornartoorujussuariartorput. Kommune Qeqertalimmi suliassaqannginnera pissutigalugu sanasut allamut qinnuteqassapput. Taamaalilluni siuariartoqarnerani sulisussat amigaataalissallutik, Ove Hansen juunimi allappoq.
Ullumikkulli allatut isikkoqarpoq.
Isornartorsiuineratami kingunitsianngua suliassat tulleriiaattut saqqummerput. Suliassalli piffissami ataatsikkoortinneqarnatik piffissanut agguataarneqartikkusukkaluarpai.
