Kommune Qeqertalimmi sanaartornermik suliffeqarfiit: Suliassaaleqivugut

- Kommune Qeqertalimmi sanaartornermik suliffeqarfiit ajornartoorujussuariartorput. Suliffeqarfinnut suliakkiissutinut allattuiffiit ukiamoortut allassimasortaqanngillat, tamannalu kommunimi suliffeqarnermut sunniuteqassaaq naggaterpiaanilu kommunip aningaasaqarneranut sunniuteqarnerlussalluni.

Aasianni Sulisitsisut immikkoortortaqarfiani siulittaasoq, Ove Hansen Kommune Qeqertalimmut ammasumik allagaqarnermini allappoq.

Taassuma sanaartornermik suliffeqarfiit suliassaaleqineq pissutigalugu sulisuminnik soraarsitsisariaqalernissaat ernumassutigaa.

- Kommune Qeqertalimmi suliassaqannginnera pissutigalugu sanasut allamut qinnuteqassapput. Taamaalilluni siuariartoqarnerani sulisussat amigaataalissallutik, Ove Hansen allappoq.

Aningaaseriviit taarsigassarsiniartarfiillu soqutiginnittut

Taassuma oqarnera naapertorlugu aningaaseriviit taarsigassarsiniartarfiillu Aasianni illutileqatigiinnik nutaanik sanaartortoqarnissaanut aningaasanik atukkiinissamut piareersimapput. Nunalli sanaartorfigiuminarsakkat amigaataapput. Nunat sanaatorfigiuminarsakkat tassaapput assersuutigalugu aqqusinermut, eqqakkat aqqutaannut, imermut aqquteqarlutillu innaallagiamik pilersuiffiusut.

- Aningaaseriviit taarsigassarsiniartarfiillu Kommune Qeqertalik niuerfittut misilittarsimanngisaannarpaat. KOmmunili sanaartornissamut nunatani tunniussitinnagu atukkiisinnaanngikkallarlutik, Ove Hansen KNR-imut oqarpoq.

Siulittaasup sanaartornermi suliassat pillugit kommuni ataatsimeeqatigaa, komunillu suliassaqalerumaartoq tassunga oqaatigaa. Taamaattoqanngilarli, tamannalu pissutigalugu Over Hansenip Aasiannilu inuussutissarsiortut ukiornissaa ernumassutigaat.

Kommune Qeqertalik: Ernumassutissaqanngilaq

Kommuni Ove Hansenimut akissuteqarnermini ukioq manna suliassanik 139 millionit koruuninik angissuseqartumik takkuttoqangajalersoq allappaa.

Matumani utoqqarnut inissianik najugaqarfinnillu 18-inik nutaanik sanaartortoqarnissaa ilaapput.

- Kommunitsinni ukiuni aggersuni suliassaqarnissaanut atatillugu ernumassutissaqanngitsoq erseqqissaatigerusupparput, Kommune Qeqertaliup sulianut ataqatigiissaarisua, Hans Inûsugtok allappoq.

Kingusissukkut suliariumannittussarsiuinerit

Aasaavoq, Kommune Qeqertaliullu allaffeqarfiani sulisut sulinngiffeqangajalerput. Tamanna Ove Hansenip oqarnera naapertorlugu kommunimit suliassanik sulisut immaqa siusinnerpaamik aggustimi sulinngiffeqareerpata aatsaat takkuttoqarnissaanik isumaqassaq.

Tamannalu kingusinaarnerusoraa.

Kommunimit suliariumannittussarsiuussisoqarpat sanaartornermik suliffeqarfiit ikinnerpaamik sapaatinik akunnernik pingasunik neqerooruteqarnissaminnut periarfissaqassapput. Tamatuma kingorna isumaqatigiissut isumaqatigiinniutigineqassalluni. Tamatuma kingorna sanaartornermut atortussat aatsaat inniminnerneqassapput.

Kommune Qeqertaliup kingusissukkut suliniuteqarnissaq suliaqartut allat aqqusaaqqaalugit aatsaat aallartinneqarsinnaaneranik tunngavilersorpaa.

- Sanaartornissamik suliaqarnissamut pilersaarusiorneq piffissamik atuiffiuvoq, pilersaarutit taakku piumasaqaataasa naammassinissaanut piareersimanissaat erseqqarinnissaallu pingaartissimavarput. Piumasaqaataasut taakku sanaartukkanik atuilersussat akornannit katersorneqarput.