Aasianni ininik attartortut qaammatini marlunni imermik kissartoqanngitsut

- Kingullertigut qaqorsaasinngiivillunga quliusinngiivillungalu uffartarpunga, tassa minutsiunngitsoq kissartueruttarmat. Soorluli nillertorsuarmik kuutsitsiinnarluni, naak kissartumik kuutsitsigaluarluni. Aasianni Aqqullummi najugaqartoq, Aqqaluk Brandt, taama oqaluttuarpoq. Qaammatillu marluk taanna imermik kissartoqarsimanngilaq.

Aqqusinerni Nalunnguarfimmi, Aqqullummi Wille Brandtsvejillu ilaani najugaqarfinni assinganik ajornartorsiuteqarput.

Ineqartut piffissami sivisuumi imermik kissartoqannginneq aatsaat misigilinngilaat.

Miki Jensen oqaluttuarpoq nulianilu najugaqarfimmut tassunga septembarimi 2009-mili nuukkamik arlaleriarlutik misigisareersimallugu. Ilaqutariimmi Jensenikkut imermik kissartoqanngillat kiassaataallu aamma iluamik kissassinnaanatik.

- Erloqinartupilussuuvoq ingappoq mikisunik meeraqarluni, naalliunnartupilussuuvoq sapaatip akunneri tamangajalluinnaasa napparsimasaramik. Nillerpallaarnera pissutigalugu tamatta nuffaseqqajaasupilussuuvugut, Miki Jensen oqarpoq.

Taakkua ineqarnerminnut kiassarnermullu qaammammut 4.600 koruuninik akiliisarput. Kisianni tassa angerlarsimaffimminni kissassimaarusullutik kiassaatinik petruuliutortumik gassitortumillu maanna ikumatitsisariaqarput. 

Taannali allallu taama atugaqartut iluamik paasineqassanatik misigisarput.

- INI A/S-imut naammagittaalliortaraluarpugut allaffianut ornigulluta, kisianni oqarfigineqartarput iliuuseqarfigineqarsinnaanata, Miki Jensen taama oqarpoq.

Taamaammallu taanna nulianilu ilaqutariillu allat atsiornernik katersipput, ataatsimoorlutik naammagittaalliorlutik. Inuit 259-it maannamut atsiorput, ilaat eqqugaaqataasut ilaallu tapersersuiniarlutik atsiorlutik. Ilaqutaariit Jensenikkut oqarput atsiornerit ulluni qaninnerni INI A/S-imut tunniunneqassasut.

A/S INI tamanna pillugu ullumikkut oqaaseqarusunngilaq.