Aasianni ilinniartut: Oqummik napparsimavugut

-Toqqissisimanarpallaanngilaq ineqatit napparsimasaqqattaartut, Silaannalummallu igalaagut ammatittuaannartariaqartarpagut, matoqqalaaraangata silaannalussisarpoq niaqorlulerlutalu.

Arnaq Jensen Avannaani ilinniarnertuunngorniarfimmi  ilinniartoq kollegiemilu najugaqartoq taama oqarpoq.

Ilinniartut kollegieni nutaannginnerusuni najugaqartut najurisamik oqoqarsinnaaneranik toqqissisimannginerat Ilinniarnertuunngorniarfiup rektorianit eqqumiiginartinneqanngilaq.

- Qularutissaanngilaq kolligieni najugaqarfiusuni oqoqarnissaa, kollegiammi pineqartut pisoqarujussuupput. Qanorli annertutigisumik oqoqarnera aammalu peqqinnissamut ajoqutaasinnaanersoq oqaatigisinnaanngilara, Rektor Flemming Guntofte Nielsen oqarpoq.

Niaqorluttarnerit, silaluttarnerit, peqqiilliornerillu allat kollegiani najugaqartunit oqoqarsimanissaanik tunngaveqarsorineqartut aamma timikkut anillattoornernik  ilaqarput.

Tamannalu iliuuseqarfigineqartariaqartoq kollegiat ilaanni najugaqartumit Laura Rosbachimit oqaatigineqarpoq.

-Aaqqinniarneqartariaqarpoq.

-Aap tamanna sukkanerpaamik iliuuseqarfigineqartariaqarpoq, Najugaqarfiillu oqoqarsorineqartut Bygge teknikerinit misissuiffigineqarnissaat suliassiissutigissavarput.

Rektor Flemming Guntofte Nielsen taama neriorsuivoq, Taasumalu aamma eqqaavaa misissuititsinerup kingorna kollegiat pineqartut oqoqarsimassappata ilinniartut allanik inissaqartinneqanngimmata, atuarfiup matuneranik kinguneqarsinnaasoq.