Aasianni GUX-imi ukiormanna atuarnermik naggartaarnersiorneq akisunaaraat
Ilinniarnertuunngorniarfiup pisortaata oqaatigaa ukiormanna aserorterisoqarnera atuarnermik naggataarnersiornernut allanut naleqqiullugu ingasannerunngitsoq.
Ukiulli siuliinut naleqqiullugu allaanerussutigaa ilinniarfiup pisortaqatigiivi ukiormanna aalajangersimammata aserorterinerit kingorna saliinermut iluarsaassinermullu aningaasartuutigineqartut naatsorsorneqassasut.
Akiligassallu katillugit 26.000 koruuniusut ilinniarfiup pisortaata Flemming Guntofte Nielsen oqaatigaa. Tamannalu 3.G-mi ilinniartunut ilinniarnertuunngorniarfimmilu sulisunut e-mailikkut ilisimatitsissutigisimavaa.
Taamatullu allagaqarnini pitsaaliuinermut atatillugu isiginiarneqassasoq aamma nassuiaatigaa.
- Ajornakusoorpoq, ilinniartut ataatsimoortillugit pillarusunnginnatsigit. Ilinniartummi amerlanerpaartaat pissuserissaartuupput. Ilinniartunulli erseqqissarusupparput taamatut pisoqarnera soorunami aningaasatigut kinguneqarmat, Flemming Guntofte Nielsen KNR-imut taama oqarpoq.
Kingunerisassaasalu ilagaat ilinniartut kissaatigisaattut naggartaarnersiorluni fiisternermi nipilersortartunik avataaneersunik tikisitsisisoqarnissaanut akissaaruttoqarnera. Taarsiullugu nipilersoqatigiit Aasianneersut nipilersortorineqassapput, GUX Aasiaanni pisortaq taama oqarpoq.
