Aasianni aallaasersortoq pineqaatissinneqartoq

Aasianni juunimi ilinniarnertuunngortut nasartaarneranni katerisimaarneq pivoq. Angut ulloq taanna siusinnerusukkut festeqataasimasoq qoorortuumik illup kateriffiusup tungaanut arlaleriarluni eqqarsimavoq. 

Tamanna pivoq angutip aallaasersortup festeqatinilu aaqqiagiinnginnerata kingorna. Eqqarfigineqartut illumut qimaasariaqarsimasut politiit allapput. 

Aallaasersortup ilaqutaata uneqqullugu oqaluutereeraa tigusarineqarsimavoq. 

Angut aallaasersorsimasoq nakuusersimasutut, siorasaarisimasutut, toqutseriarsimasut inuillu inuunerannik ulorianartorsiortitsisimasutut Aasiaat eqqartuussivianni ullumi tallimanngornermi eqqartuunneqarpoq. 

Unnerluussisussaatitaasut piumasarisimagaluarpaat angut ukiuni tallimani isertitsivimmut inissinneqassasoq, taamaattoq ukiuni sisamani pineqaatissinneqarnera naammagisimaarpaat. 

- Aallaasersornermi iluatsitsinerinnakkut ajoqqusertoqaranilu toqusoqanngilaq. Unnerluutigineqartup inuit arlallit ulorianartorsiortippai. Taamaammat angutip pineqaatissinneqarnera naammagisimaarparput, politikommisæriugallartoq Aasianni Qaasuitsup politiianeersoq, Arne Sandgreen Reimer, allappoq. 

Unnerluutigineqartup pineqaatissinneqarnini akueraa. 

Aamma atuaruk Aasianni ilinniarnertuunngortut aallaasersorfigitittut