VIDEO Aasiammiup isumassarsiani tunisassianngortippaa
Kalaallit namminneq nassaavannik tunisassiassaalersussamik sunaaneranillu paasiniaalluta arnaq isumassarsisoq angerlarsimaffianut takunniarparput.
Agathe Steenholdt, meeqqat atuarfianni ilinnartitsisoq, 2009-mili isumassarsiaralugu ineriartortissimasani ullumikkut piviusunngortissimalerpaa.
Danmarkimilu suleqatiminit kuitsiviliuussisuminninngaanniit siullerpaanik naammassisanik tikittoorsimalerput.
Suulluunniit nutaat tamarmik taaguuserneqartarmata nassaartoq aperaarput isumassarsiani qanoq taaguusersimaneraa.
- Naqinnernik taasarpagut, kisianni ateqarpoq Sikki, Agathe Steenholdt KNR-imut oqarpoq.
Kipparissuarannguit qeqqatigut aqerluusamut naammaguttumik putullit naqinnernillu naqitsivigineqarsimasunik tikittooqqammerpoq.
Tunisassiaq nutaaffaarik pisiniarfinni pisiarineqarsinnaalersussanngorpoq, tamaangali killinnginnermi piviusunngornissaanut siunnerfik assigiinngittutigut qanilliartuaarneqarsimavoq.
Isumassarsiap illersuusernissaa pisariaqarsimavoq.
- 2014 naalersoq qinnuteqarpugut patentitaarnissatsinnut, taavalu qujanartumik taanna Danmarkimi akuerisaavoq, taavalu 2015-mi patentitaarluta. Taavalu ilusaa allanngortilaarnikooriaratsigu nutartertissimavarput, taanna aamma akuersissut qanittumi takkuppoq, Agathe Steenholdt oqarpoq.
Tunisassiap akuutissanik ulorianartunik akoqannginnissaa pingaartinneqarsimasoq eqquutsinneqarsimavoq, maannakkullu Aasianni pisiniarfiup Qajaasap misiliutingalugu nioqqutingilereerpaa.
