Aasiaat radioa: Illoqarfimmi paasissutissiinissaq pingaaruteqarpoq

Maniitsumi radiuleriumatuut illoqarfimmi eqaarsaaniarlutik radiomik nutaamik pilersitserusupput.

Maniitsumi innuttaasut tusaaneqarnerusinnaasut taakku isumaqarput.

Avannarpasinnerulaartumi Aasianni, 60-inik ukiulik, Arqaluk Brandt Johansen Qeqertarpaat Tusaataani radioqarfimmiippoq. Taassuma illoqarfiup radioqarfia ukiuni katillugit 18-ini suliaqarfigaa.

Taassumalu radiuleriumatuut Maniitsumiittut iluatsitsilluarnissaannik kissaappai.

Radio suli pingaaruteqartoq – inuit tamarmik oqarasuaammik angallattagaqanngillat

Taassuma Aasianni radioqarfeqarnissaa pingaartuutippaa, aamma naak inoqatinut attaveqaatit innuttaasut akornanni atugaaneruleriartuinnaraluartut. Qeqertarpaat Tusaataat aqqutigalugu illoqarfinni nunaqarfinnilu allani radioqarfiit tusarnaarneqarsinnaapput.

AAMMA ATUARUK Maniitsormiut radiumik uummaarissumik pilersitserusuttut

Arqaluk Brandt Johansen Aasianni radioqarfimmik pilersitsiniartut siulersuisuini 1998-imi ilaavoq.

- Taamanikkulli pingaaruteqartutut isigaara. Ullumikkut aamma suli pingaartippara.

- Ajornannginnerpaagaluarmat suli radiu ikiinnarlugu arlaannik paasissutissanik tunineqarsinnaaneq. Sumiikkaluaraanniluunniit raadioqaraanni ikinneqarsinnaavoq. Pingaaruteqarnera minnerulinngilaq, naak ullumikkut tusagassiuutit allat aamma annertoorujussuarmik atugaagaluartut, assertuutigalugu Facebook. Kisianni kikkut tamarmik Facebookimik atuisuunngillat, Arqaluk Brandt Johansen oqarpoq.

Innuttaasunut radio aqqutigalugu pitsaanerusumik paasissutissiineq

Qeqertarpaat Tusaataat radioqarfiuvoq Aasianniittoq, tassannga sumiiffinnit allanit minnerusunit soorlu Kangaatsiamit Qeqertarsuarmiillu aamma tusarnaartoqarsinnaavoq. Radioqarfimmilu tassani aamma pulaartoqartarpoq, radiukkut bingortitsisoqartarpoq pilluaqqussuteqartoqartarlunilu.

- Lokalradiu anersaavanni suli atorpoq, kinaluunniit innuttaasoq maanga iserluni arlaannik piukkussaqaruni aallakaatassiaasinnaasumik oqariartorsinnaavoq, uanga taanna ukiuni arlalinni pingaartinnikuuvara.

Paasissutissalli kommunimit oqartussaniillu allaneersut innuttaasunut attuumassuteqartut aamma pingaaruteqartut, Arqaluk Brandt Johansen oqarpoq.

Taanna assersuuteqarpoq:

Assersuutigalugu kommunimit eqqaavinnik isumaginninnermut akinik allanngortitsisoqaraangat innuttaasut akinut pakatseqqasinnaasarput. Kommuni akiligassamut 20 koruunimik akitsuisinnaasimasarpoq, tamannalu nalunaarutigineqarsimanngikkaangat innuttaasut pakatsissutigisinnaasarpaat.

- Nalunngikkunikku 20 koruuni sumik aallaaveqarluni taamatut qaffariarsimasoq, taava eqqissisimanerusumik paasissutissaq tigusinnaavaat. Imaappoq paasissutissiineq suugaluartunilluunniit pingaaruteqartorujussuuvoq, inuit atugaanut sunniuteqartorujussuuvoq. Arqaluk Brandt Johansen oqarpoq.

- Kommuniminngaanniit immaqa maanngartoqarsinnaavoq oqaluttuarluni una 20-koruunimik akitsornialerparput, taava taanna radiukkut sammillugu. Taava una 20-koruuni sumi aallaaveqarnersoq tusartittaqattaarutsigu kingorna inuit paasissaqqaarpaat sooq akitsorneqarneq ilanngunneqartariaqarsimasoq.

Arqaluk Brandt Johansen Qeqertarpaat Tusaataanni ingerlatsinermi nalinginnaasumik kisimiittarpoq. Radioqarfik namminersortunik aningaasaliisunit tapiissuteqarfigineqartarpoq, Kommune Qeqertalimmilli kiffartuussinissamut isumaqatigiissut piariingajalerpoq. Isumaqatigiissummi Qeqertarpaat Tusaataanut tusagassiortumik atorfinitsitsinissamut akissaqalernissamik ilaatigut qulakkeerutaassaaq.