Maniitsormiut radiumik uummaarissumik pilersitserusuttut
Maniitsumi raadioleriumatuut peqatigiiffimmik pilersitsipput. Peqatigiiffik Maniitsumik Radiumik ateqarpoq. Tassani ataatsimut anguniagaqarput: Maniitsumi radioqarneq eqeersimaartuussaaq.
Radioqarneq pillugu peqatigiiffimmi nutaami siulittaasup tullia, Paalu Møller oqarpoq.
Assi: Paalu Møller.
- Uummarissumik Maniitsumi radiuqalernissaa anguniagarivarput, pissutigalugu isumaqaratta innuttaasut tusaaneqarnerusinnaasut. Taava aamma peqatigiiffiit, suliffeqarfiit pisortallu nalunaarutaat ersarinnerusumik nittarsaanniarlugit takorloorparput.
- Imatut takorloorparput innuttaasut nipaat tusarneqarnerulernissaat. Soorlu arlaannik nalunaaruteqarusuttoqaruni, pilluaqqusisoqarusukkuni imaluunniit aamma oqallitsitsinermik aallartitsisoqarnermik nittarsaassinissarput.
Maniitsumi radioqareersoq, tassanili innuttaasut akuutinneqartarnerat naammanngitsoq peqatigiiffik isumaqarpoq.
- Maani lokalradiuqareeraluarpoq, kisianni taanna nipilersukkaniunerusoq taavalu kommunalbestyrelsep ataatsimiinnerinik aallaatitsisarami, Paalu Møller oqarpoq.
Radioinnaanngitsoq
Peqatigiiffik radioqarfimmik pilersitsinissamut maanna aningaasassarsiortussanngorpoq. Illoqarfiup radioqarfianik pilersitsinissamut atortorissaarutinik aamma pissarsioqassaaq. Maniitsumi innuttaasut qaqugu radiokkut tusarnaarsinnaanngussanersut peqatigiiffiup ullulersinnaanngilaa, tamannali sulissutigineqarpoq.
- Neriuqaagut aningaasaleerusuttunik nassaarluarnissarput. Una takorluugaq assut aallartikkusunnarami piviusunngortikkusunnarlunilu. Ikittunnguugaluarluta upperivarput piviusunngortinnissaa.
Peqatigiiffimmi siulersuisut tallimaapput.
Paalu Møller TV-mi teknikeritut ilinniarsimavoq, KNR-illu ataani Qanoruumi sulinikuulluni. Taanna Maniitsumut peroriartorfigisaminut qanittumi uteqqeqqammerpoq.
Uteqqinnerminili amigaateqartutut misigisimavoq.
- Malunnarami Maniitsumut uterluni qanga peqatigiiffiit uummaarissorpassuunikut tusarsaajunnaartut. Tassunga malunnarpoq illoqarfiup uummaarinnera soorlu annikillisimasoq. Taannartaa assut anneralugu eqqarsarnikuuvunga taamatut radiumik pilersitseqataarusullunga. Ilimagigakku illoqarfik uummaarinninnera annertusarnerusinnaallugu.
Oqarasuaatit angallattakkat piffissami matumani tusarnaartartunik tigusingaatsiarput. Taamammat Paalu Møllerip peqatigiiffiullu radio kisiat sulissutiginiarnagu takorloorpaat.
- Tassa eqqartornikuuvarput radiuunnaasariaqanngitsoq, aamma TV-lerinerit ingerlanneqarsinnaapput periarfissallu allat eqqartorneqarnikuupput. Kisianni radiu toqqammavigissuarput, Paalu Møller oqarpoq.
