Aasiaat avataanni qillerigaluarneq iluatsinngilaq
Cairn Energyp nittartakkamini ullumi nalunaarutigaa, misiligummik qilleriffigineqartumi Napariaq Blokimik taagorneqartumi, Aasianniit 400 kilometerinik avasissulimmiittumi qillerinerit iluatsitsiffiunngitsut.
- Qillerissutip Leiv Eirikssonip Napariami 293 meterinik itissusilimmi qillerinini maanna unitsereersimalerpaa, qilleriffigisani matoreerlugu qimareerlugulu. Cairn Energy ullumi taama nalunaaruteqarpoq.
Ilanngullugu ilisimatitsissutigaat, qillerutip Leiv Eirikssonip qillerinermini 2.977 meterisut itissusilimmut anngussimasoq, uuliaqarsinnaaneranillu takussutissanik naammattoorsinani.
Avannarpasinnerusumi qillerinerit, soorlu Aasiaat eqqaanni qanittukkut matuneqassapput, taamaattorli Leiv Eiriksson kujasinnerusumi qillereqqileruni, tassa Atammik-blokimik taaneqartumi, ukiormanna misiliiffigeriikkamini iluatsitsinerunissaa, Cairn Energymit neriuutigineqarpoq. Tamaani qillerineq Cairnimit unitsikkallarneqarluni Napariaq Blokkimut nuuttoqaraluarpoq, maannalu tamanna qimaannarneqarluni.
Aamma qillerut Ocean Rig Corcovado kujavartertoq, Cairn Energymit ilisimatitsissutigineqarpoq, ukiormannalu qillerinini naggaserlugit Atammik Blokimi Nuummit 200 kilometerinik avasitsigisumi, 1045 meterinik itissusilimmi qillerissalluni.
